Kwasha Mwine Njibo Alanguluke
1. Le i musapwilo’ka mulumbuluke mu mwingilo?
1 Lelo i musapwilo’ka muyampe mpata mu mwingilo—wa kaninga mpo’ni nansha wa kukwasha mwine njibo alanguluke ne kufula ku mvuyo miyampe? Mutumibwa Polo wādi wisamba na Bayuda ba mu Tesalonika kupityila ku mikanda, ‘penepo bamo bamo bakwabo baitabija.’ (Bil. 17:2-4) Le i bika bilomba pa kulanguluka na bakwetu?
2. I muswelo’ka otubwanya kwiula kimfwa kya Polo potusapula myanda miyampe?
2 Bandaula Milangwe ne Kitamina: Musapwilo wa kulanguluka i owa wa kuta mutyima ku milangwe ya bantu ba mu mwaba. Polo wāshilwile mwisambo na Bangidiki bampikwa kwitabija ba mu Aleopakusa na kutela bintu byobadi bayukile ne byobadi betabije. (Bil. 17:22-31) O mwanda kitatyi kyoteakanya mwisambo obe, bandaula nkulupilo ne bintu bifwatakanya bantu ba mu wenu mwaba. (1 Kod. 9:19-22) Shi mwine njibo wapele, longa bukomo bwa kusokola mwanda omwitabije banwe bonso ne kwimanina’po mu mwisambo obe.
3. Lelo i muswelo’ka otubwanya kulanguluka biyampe na bakwetu na kwipangula kipangujo na bunwa?
3 Ipangula Bipangujo na Bunwa: Ketubwanyapo kupa munangi bulombodi bwa kumukwasha afike kwaenda pakubulwa kuyuka kifuko kine kyaenda’ko. Mo monka, netu ketubwanyapo kukwasha mwine njibo afule ku mvuyo miyampe pampikwa kuyuka milangwe yandi. Kumeso kwa kulanguluka na mwivwaniki, divule Yesu wādi wipangula bipangujo mwa kuyukila milangwe ya muntu. Kimfwa, muntu umo paāipangwile Yesu amba, “Lelo nonga namani mpyanepo būmi bwa nyeke?” Yesu wādi ujingulula mumweno wa muntu kumeso kwa kumulondolola. (Luka 10:25-28) Pakwabo kadi, kitatyi kyālondolwele Petelo bya bubela, Yesu wāipangwile bipangujo na bunwa mwanda wa kulemununa milangwe yandi. (Mat. 17:24-26) O mwanda shi mwine njibo waipangula kipangujo nansha kumwekeja milangwe mibi, tubwanya kwipangula bipangujo bya kumukwasha alangulukile pa myanda.
4. Mwanda waka tufwaninwe kulonga bukomo bwa kukwasha mwine njibo alanguluke?
4 Ponso potukwasha mwine njibo alanguluke twiulanga Yesu, Mufundiji Mukatampe, ne basapudi bakwabo ba bwino ba mu myaka katwa kabajinji. Tulombolanga bulēmantu ku mwine njibo ne kumulēmeka. (1 Pet. 3:15) Ku mfulo ubwanya kwitabija tumujokele.