Tulumbululei Manwa Etu mu Mwingilo—Na Kulondolola ku Bijika Bikokeja Kwimika Mīsambo
Kyo Kwikadile na Mvubu: Langa’po bidi shi uyukile amba kudi kimpengele kya kipangila kisa kulongeka. Bantu basa kufwa, poso’nka shi banyeme nabya bapande. Ubaenda kukadyumuna mulondakani nobe, ino aye wakukete na kunena’mba udi na bivule bya kulonga. Na bubine, kusapo kuleka bukidibukidi bukomo bolonga mwanda wa kumukwasha! Bavule mu mwaba wetu bapelanga kwitwivwana, mwanda kebayukilepo mvubu ya kupandija būmi idi na musapu wetu. Padi kitatyi kyotwiya kwibapempula’kya badi na bivule bya kulonga. (Mat. 24:37-39) Nansha padi i pa mwanda baivwene biñuniñuni bya bubela. (Mat. 11:18, 19) Babwanya kulanga amba ketwishidīlepo na bino bipwilo bikwabo bimwekejanga bipa bibi. (2 Pe. 2: 1, 2) Shi muntu kasangedilepo musapu dibajinji, ketufwaninwepo kala kuzoza.
Mwa Kulongela:
• Kumeso kwa abe kutambila mu busapudi bwa ku njibo ne njibo, wilamije’ko kitatyi kityetye kya kulangulukila pa bijika bikokeja kwimika mīsambo byobwanya kutana, kupwa kimba ne mwa kulondolwela’ko.
• Shi muntu waleta kijika kampanda, tompa kwendeleja misambo na butūkanye. Padi ubwanya kulonga namino na kumufwija’ko. Kimfwa, shi wanena’mba ndi na mutōtelo wami, ubwanya kunena’mba, “nadi kala kimba kutana muntu na abe’o, usangela bintu bya ku mushipiditu.” Kyaba kimo kuyuka bilanga muntu nansha ngikadilo yadi’mo kukakukwasha wendelele na kupāna bukamoni. Kimfwa, shi muntu wanena’mba ndi na bingi bya kulonga, ubwanya kunena amba: “Biyampe. Ino kumeso kwa ami kwenda nadi kimba kukushila’ko kino kintu.” Muswelo mukwabo i na kwipangula kipangujo shi muntu wanena’mba kebimusangejepo. Ubwanya kumwipangula amba, “Usaka kunena’mba kine kekikusangajapo i Bible’ni, nansha i mutōtelo’tu mu kikonge ye keukusangajangapo?”
• Ikala na kusansanya. Vuluka amba Yehova kaningilangapo bantu bamuteje. (Kup. 30:19) Muntu ne muntu ufwaninwe kwiselela aye mwine kiselwa kyandi kya ku mushipiditu. (Ngt. 6:5) Shi muntu wapele pelē, i biyampe kumuleka. Shi tulēmeke milangwe yandi, nabya tukashīla musapudi mukwabo mukenga wa kwiya kumusapwila mwenda mafuku.—1 Pe. 3:15.
Tompa Kulonga Namino uno Kweji:
• Shi ubatana kijika kikokeja kwimika mīsambo, kitatyi’tu kyomushiya mwine njibo, i biyampe mwisambile na mwanetu osapula nandi pa muswelo muyampe owadi ufwaninwe kulondolola.