Tulumbululei Manwa Etu mu Mwingilo—Mwa Kulondolwela Mwisambi-Netu Kilobo

Kyokwikadile na Mvubu: Bantu bamo botutana mu busapudi badi’tu na bulēme. Inoko, Yesu wālaile amba bamo baketushikwa. (Yoa. 17:14) Ketufwaninwepo kutulumuka shi tubatana mwisambi-netu kilobo. Shi tubamutana, tusakanga kulondolola mu muswelo usangaja mwine otwimanine, ke Yehova kadi. (Loma 12:17-21; 1 Pe. 3:15) Kulondolola namino kukalengeja myanda ileke kukola. Kukekala ke bukamoni ku mwisambi-netu ne ku boba batala, ne kwibalengeja bakekale na mutyima wa kwitabija pakāya Batumoni ba Yehova.—2 Ko. 6:3.

Mwa Kulongela:

Ikala utalala ne kumweka bya bulunda. Uno mwikadilo ukatalaja bulobo. Kokatala byalonga mwinē njibo. (Mus. 7:9) Padi kudi kimukambakanya kilengeje alobe, nansha padi ubafikanga pa kitatyi kibi. Nansha shi musapu o wa mulobeja, napo i pa mwanda i mongolwe.—2 Ko. 4:4.
Londolola na butūkanye ne na binenwa bilumbuluke. (Nki. 15:1) Lelo wadi ubamulangula nansha kumutyibikija byaadi ulonga? Nansha shi ketumulombepo lusa pa mwingilo wetu, ino tubwanya kumulomba’lo pa kwiya kotwaiya pa nsá mikomo kwadi. Le ulobele pa mwanda wa bubela bobamulombwele potudi? Shi i nankyo, tubwanya kumwipangula’mba: “Naimvwana mwanda waka uno mwanda ukulobeja. Inoko, bimweka bu myanda yowaimvwene potudi yadi ya bubela. Le mbwanya kukushintwila’yo?” Shi ulobele pa mpangiko yetu ya kupanga muntu nansha ya mashi? Ubwanya kunena’mba: “Naimvwana. Kudi ne bakwabo badi banena’nka nankyo. Le nkokeja kukulombola pobanene’byo mu Bible obe?”
Shi muntu i mulobe bininge, pavule i biyampe kwenda pampikwa kulondolola. Shi wanena’mba Batumoni ba Yehova kebakīya monka kumpempula, tukokeja kumulondolola’mba, biyampe.

Tompa Kulonga Namino Uno Kweji:

Longai bya kumwena’ko mu butōtyi bwa kisaka.
Pomushiya mwisambi-nenu kilobo, mwisambei na omusapula nandi pa muswelo muyampe omwadi ba kulondolola.