“Mwikale ne Ndoe ne Bantu Bonso”
1. I madingi’ka a mu Bible otukokeja kwingidija shi tubatana mwinē njibo witulobela?
1 Bantu ba Yehova basenswe ndoe, kadi ne mwingilo wetu mwine i mwingilo wa ndoe. (Is. 52:7) Inoko, kyaba kimo, tutananga bantu betulobela mwanda tubaiya kwi banangila. Le i bika biketukwasha twikale ba ndoe mu ino ngikadilo?—Loma 12:18.
2. Mwanda waka kidi na mvubu kotudi kwikala na bujinguludi?
2 Ikala na Bujinguludi: Nansha bitulobelanga bamo mwanda kebaso bubinebine, inoko ku bakwabo, ke kushikwapo bubinebine. Kepabulwe padi tubebafikila pa kitatyi kibi. Mwinē njibo ukokeja kwikala mulobejibwe na myanda mikwabo imutala. Nansha kadi shi i myanda miyampe yamulobeja, tuvulukei amba padi kyapelela i mwanda i bamulombole bya bubela potudi. (2 Kod. 4:4) Bujinguludi buketukwasha tutūkanye ne kuleka kulanga’mba udi netu mwanda.—Nk. 19:11.
3. I muswelo’ka otukokeja kulombola bulēme ku mwinē njibo?
3 Lombola Bulēme: Bantu bavule mu mwaba balamete pototo ku nkulupilo yabo imbajinji. (2 Kod. 10:4) Badi na bwanapabo bwa kutonga kwituteja nansha kupela. Ketukasakepo nansha dimo kupēlula nkulupilo ya mwinē njibo nansha kwimwekeja bu twi bamupite. Shi wakupanga, taluka na bulēme bonso.
4. Kunena binenwa bya buntu kushintulula bika?
4 Binenwa bya Buntu: Nansha shi abetutuke, batwe tulondololei na binenwa bitobala, bya buntu. (Kol. 4:6; 1 Pet. 2:23) Pa kyaba kya kukimba kwipatanyapatanya, kimba’ko mwanda wakokeja kusangela. Padi na kanye tukokeja kumwipangula bubinga bwine bwapelela. Kyaba kimo i biyampe kwimika mīsambo mwanda kutyina luma.—Nk. 9:7; 17:14.
5. I byabuyabuya’ka bidi mu kwikala ba ndoe mu mwingilo?
5 Shi tudi ba ndoe, mwisambi netu padi ukavuluka kitūkijetyima kyetu wafula ku kuteja musapu difuku dikwabo. (Loma 12:20, 21) Nansha shi i mupele na mutyima umo, difuku dikwabo padi ukokeja kwikala ke mwanetu. (Ngat. 1:13, 14) Ekale wate mutyima ku bubinebine nansha apele, shi twendelele kwikala bakwifula ne ba ndoe, tukatumbija Yehova ne kulumbulula bufundiji bwetu.—2 Kod. 6:3.