Ingidija Dibuku Ikala Mūmi Nyeke! pa Kukomeja Lwitabijo Mudi Yehova ne Mudi Yesu

Pakusaka’mba befundi ba Bible basangaje Yehova, bafwaninwe kwikala na lwitabijo lukomo. (Bah 11:6) Nanshi twingidijei dibuku Ikala Mūmi Nyeke! mwanda wa kutenga mityima yabo. Dino dibuku didi na bisonekwa bitenga mutyima, myanda ipēla kwivwana, bipangujo bifikepo, mavideo asangaja ne bifwatulo bisangaja. Shi tukwashe befundi ba Bible batamije ngikadila ya bwine Kidishitu ne kipwano kyabo na Leza, nabya tubakanga pa kyalwilo kikemanija ku mudilo.​—1Ko 3:12-15.

Bantu bamo bamonanga amba i bikomo kupwana na Leza mwine okebamwenepo. O mwanda tufwaninwe kwibakwasha batamije lwitabijo mudi Yehova Leza wa buswe.

TALAI VIDEO KOMEJA LWITABIJO MUDI YEHOVA, NA KWINGIDIJA DIBUKU “IKALA MŪMI NYEKE!” KUPWA LONDOLOLAI BINO BIPANGUJO:

• Le i bika bilombola amba uno kaka wadi muteakanye senene myanda yobakefunda?

• Le i muswelo’ka waaingidija Isaya 41:10, 13 na kwipangula bipangujo bya ntentekelo pa kuyuka bidi mu mutyima wa mwifundi nandi?

• Le video ne mavese a mu Bible byatengele namani mutyima wa mwifundi?

Bantu bavule kebevwanijepo kinkūlwa i kika, nansha kumona’mba i kyabuntu kibapele Leza. (Ngt 2:20) O mwanda tufwaninwe kwibakwasha bakomeje lwitabijo lwabo mu kinkūlwa kya Yesu.

TALAI VIDEO KOMEJA LWITABIJO MUDI YESU, NA KWINGIDIJA DIBUKU “IKALA MŪMI NYEKE!” KUPWA LONDOLOLAI BINO BIPANGUJO:

• Le i bika bilombola amba uno tutu wadi muteakanye senene myanda yobakefunda?

• Le i muswelo’ka waaingidijanga myanda idi mu kipindi “Kimba” pa kukwasha mwifundi nandi?

• Mwanda waka kutela mwifundi mu milombelo i kwa mvubu?