Sapula na Boloshile Nansha na Dibuku Ikala Mūmi Nyeke!

Kwikala na boloshile mupya ne dibuku dipya bya kwendeja nabyo bifundwa bya Bible, bine i kwituletele nsangaji ya kashā! Tulomba Yehova esele bukomo bwetu tulonge bana ba bwanga bavule. (Mat 28:18-20; 1Ko 3:6-9) Le i muswelo’ka wa kwingidija bino bingidilwa?

Uno boloshile mupya ne dibuku dipya Ikala Mūmi Nyeke!, bidi na manwa mapya a kwendeja nao bifundwa bya Bible, o mwanda londa buno bulombodi bonso kitatyi kyowiteakanya ne poendeja bifundwa bya Bible.a

• Tangai myanda yonso, ne kwisambila pa bipangujo

• Tangai bisonekwa byonso bilembelwe’po amba “tanga”, kadi kwasha mwifundi amone mwa kwibingidijija mu būmi

• Talai mavideo onso ne kwisambila’po, mwisambilei ne pa bipangujo byonso bikwatañene na myanda’ya

• Ponso poendeja kifundwa, longa bukomo bwa kupwa kifundwa kyonso kituntulu

Shilula kwifunda na muntu mu boloshile mwanda wa kuyuka shi usangedile kwifunda. (Tala kapango “Mwa Kupānina Boloshile Ikala Mūmi Nyeke! mu Kwitana Kubajinji.”) Shi mubapu boloshile, muntu wasake kwendeleja, nabya mupe dibuku ne kushilula nandi mu kifundwa 04. Shi wifundanga na muntu mu dibuku Bitufundija nansha Kwikala Nyeke mu Buswe bwa Leza, tundulukila nandi mu dibuku Ikala Mūmi Nyeke! ne kutala abe mwine pomubwanya kushilwila.

TALAI VIDEO WAKO, WAKO KU KIFUNDWA KYOBE KYA BIBLE, KUPWA LONDOLOLAI BINO BIPANGUJO:

• Le i bika bikafunda mwifundi mu dino dibuku dipya?

• Mwanda waka shi muntu washilula kwifunda dino dibuku, musapudi ufwaninwe bidi kumutadija ino video?

• Le i bitungo’ka byobwanya kukankamika mwifundi etungile ne kufikila’po mwenda mafuku?​—Tala tabulo “Pemanine Kipindi ne Kipindi ne Bitungo Bya’kyo”