Mwa Kwingidijija Myanda Miyampe Itamba Kudi Leza!

Boloshile Mupya Ulupwilwe Mwanda wa Kwitukwasha Tulonge Kujokela’mo Kupya, ne Kushilula Bifundwa bya Bible

1. Le i boloshile’ka mupya walupukile ku Kitango kya Distrike “Lama Obe Mutyima!” witukwasha mwa kulongela kujokela’mo ne kushilula bifundwa bya Bible?

¹ Kitatyi kya Kitango kya Distrike kyadi ma mutwe wa mwanda unena’mba, “Lama Obe Mutyima!” twasangele pa kutambula boloshile mupya wa kwitukwasha mwa kulongela kujokela’mo, ne mwa kushilwila bifundwa bya Bible. Myanda Miyampe Itamba Kudi Leza! I mwiifwane na Kisaka Leza boloshile wapingakene, mwanda bifundwa byandi i bīpi. Uno boloshile upēla kwingidija pa kushilula bifundwa bya Bible potusapula ku njibo ne njibo. Kisaka Leza wadi ulombola byobya bisakibwa ku bene Kidishitu, bintu byadi bikoma kwivwanwa na befundi bapya. Inoko, uno boloshile mupya wimanine nakampata pa myanda miyampe idi mu Bible.—Bil. 15:35.

2. Mwanda waka kwalupwilwe boloshile Myanda Miyampe?

² Mwanda waka balupwile’ye? I mwanda banabetu kujokoloka ntanda yonso, badi bepangula muswelo upēla wa mwa kukokela bantu ku bubinebine kumeso kwa kwifunda nabo kupityila ku Bifundija Bible, kingidilwa kyetu kya kyalwilo kya bifundwa bya Bible. Boba batyina kwifunda mu kitabo, divule basangelanga kwifunda kupityila ku boloshile. Ne kadi, boloshile upēlanga kwalamuna mu ndimi mivule.

3. I kwishila’ka kwishidile uno boloshile na bingidilwa bikwabo bya kwifunda?

³ Muteakanibwe Uno Boloshile: Mabuku mavule a kwifunda i malembwe mu muswelo bantu obakokeja kwiatanga ne kwivwana bubinebine, nansha shi kebadipo na wa kwibafundija. Ino uno boloshile i mwishile. Muswelo walembelwe ulombola’mba kufwaninwe kwikale’nka ne muntu wa kwimanina kifundwa kya Bible. O mwanda shi ke tupe’ye muntu i biyampe bidi Kubandaula nandi musango umo nansha ibidi. Misango yayo byoidi mīpi, ikokeja kubandaulwa musunsa umbajinji na muntu, ku njibo nansha ke mu myaba ya busunga. Shako bikalanga biyampe kushilula na kifundwa kibajinji, inoko tudi ne na bwana pabo bwa kushilula na kifundwa kyo-kyonso kya mu boloshile.

4. Le uno boloshile witukwashanga namani tufundije patōkelela byobya bitamba mu Bible?

⁴ Mu mabuku etu mavule, bipangujo bitampwe bidi na malondololo mu misango. Ino mu uno boloshile, divule dine malondololo adi mu Bible. Bantu bavule basangelanga kwifunda mu Bible pa kyaba kya kwifunda mu kitabo. O mwanda kekudipo nansha kisonekwa kimo kipitulukilwe kala mu misango. Bino bisonekwa bifwaninwe kutangibwa mu Bible. Kino kikwasha befundi bevwanije’mba byobya byobefunda bitambanga kudi Leza.—Is. 54:13.

5. Kumeso kwa kwifunda, mwanda waka kidi na mvubu kwilongolola senene?

⁵ Uno boloshile kashintululangapo bisonekwa byonso. Mwanda waka? I muteakanibwe mwanda wa kukankamika mwifundi epangule bipangujo ne kupa musapudi mukenga wa kwingidija bwino bwandi bwa kufundija. O mwanda kidi na mvubu kwilongolola senene kumeso kwa kwendeja kifundwa ne kifundwa. Dyumukai: Lekai kunena bivule. Twikalanga nyeke tusenswe kushintulula Bisonekwa. Ino pavule pene i biyampe tupe mwifundi mukenga wa aye mwine kunena mwalangila pa kino kisonekwa. Kwipangula bipangujo na bunwa, kuketukwasha tulanguluke nandi pa mushintulwila kisonekwa ne kisonekwa.—Bil. 17:2.

6. I muswelo’ka otukokeja kwingidija uno boloshile: (a) mu kifuko mudi bantu batatana kwikala’ko kwa Leza ne kupela Bible? (b) kitatyi kyosapula ku njibo ne njibo? (c) pa kushilula bifundwa bya Bible musunsa umbajinji? (d) kitatyi kyotulonga kujokela’mo?

⁶ Enka na mokilongelwanga ku mabuku makwabo a kwendeja nao bifundwa, uno boloshile ukapānwa kitatyi kyo-kyonso, nansha shi keidipo mu bya kupānwa bya mu kweji’wa. Bavule bakasangela kushilula nayo bifundwa musunsa umbajinji ku njibo. Ino kadi’nka mokyalombwedilwe ku Kitango kya Distrike, kitatyi kyotujokela boba basangedile musapu, uno boloshile “na bubine ukokeja kukwasha kulonga mwingilo wa kujokela’mo wikale kusangaja!”—Tala tupango pa paje 5-7.

7. Lombola mwa kwendejeja kifundwa kya Bible na kwingidija uno boloshile.

⁷ Mwa Kwendejeja kifundwa: Shilula kifundwa na kutanga bidi kipangujo kitampilwe mu masomo matyite. Kupwa, tanga musango ne kisonekwa kimo (nansha bivule) bisendeke. Ipangwila’ko ne bipangujo bya ntentekelo na bunwa mwa kukwashisha mwinē njibo evwanije senene Bisonekwa. Ebiya, kumeso kwa kupityila ku nimelo ya kipangujo kilonda’ko, ipangula mwinē njibo alondolole ku kipangujo kitampilwe mu bityite, mwanda wa kuyuka shi waivwanija. Mu kwifunda kubala kunga kwa ku ñanjilo i biyampe kubandaula kipangujo kimo kete mu byobya bitampilwe mu bityite. Mwenda mafuku ebiya kobwanya kulepeja’ko mīsambo padi na kuvuya kifundwa kituntulu.

8. Le ukateakanya namani ñeni ya mwivwaniki pa kutanga kisonekwa, ne mwanda waka?

⁸ Bisonekwa bya mu Bible binenwe’po’mba “tanga” byo bilondolola patōkelela ku bipangujo bitampilwe, mu bityite. Kitatyi kyotela bisonekwa, ke biyampepo kunena’mba, “Mutumibwa Polo wālembele’mba,” nansha’mba, “tala byānene Yelemia.” Mwinē njibo padi ukokeja kulanga’mba tutañanga myanda ya bantu ba bituputupu. Kikekala kiyampe kunena’mba, “Kinenwa kya Leza kinena’mba” nansha’mba, “tala byalaile Bible.”

9. Potwendeja bifundwa, le tunenwe kutanga bisonekwa byonso bitelelwe?

⁹ Le tunenwe’nka kutanga bisonekwa byonso bitelelwe’mo’ni nansha i’nka byobya binenwe’mba “tanga?” I kukwatañana na ngikadilo ya muntu ne muntu. Kisonekwa kyonso kitelelwe kidi’nka ne katelelo. Kisonekwa kyonso kitelelwe kikwatañene na myanda ifundwa. Ino kyaba kimokimo mwifundi ukokeja kusaka tutange’nka Bisonekwa bitelelwe amba “tanga,” padi i mwanda wa kadipo na kitatyi, kusepelela kutyetye, nansha kukolelwa pa kutanga.

10. I kitatyi’ka kyotukokeja kushilula kwifunda na muntu mu dibuku Bifundija Bible?

¹⁰ Pa Kutwela mu Dibuku Bifundija Bible: Shi tubefunde misunsa mivule ne kulondakanya bifundwa pa kubulwa kutabukatabuka, nabya tukokeja kusambukila ku dibuku Bifundija Bible nansha kwendeleja mu boloshile Myanda Miyampe kufika’nka ne byotukavuya’ye. Basapudi abo bene bakokeja kunañuna shi bibalomba kushinta. Shi tubashinta na kutwela mu dibuku Bifundija Bible, le bilomba kushilwila’nka ku ñanjilo? I abe mwine wa kutyiba mbila. Bantu i beshileshile. Ino befundi bavule bakamwena mpata mu kubandaula mitwe ya myanda imo yonka na kwifunda’yo monka pa bute pa bute mu dibuku Bifundija Bible.

11. Mwanda waka tufwaninwe kwingija senene uno boloshile mupya?

¹¹ Nansha mu ino ntanda byo musakene myanda miyampe, ino batwe tudi na dyese dya pa bula dya kusapula myanda miyampe—ya amba Bulopwe bwa Leza ke bubikale ne amba panopano ponka busa kuleta ntanda impya ya boloke! (Mat. 24:14; 2 Pet. 3:13) Tukulupile’mba bantu bavule bakevwana uno musapu baketabija bino binenwa bya ku bukomo bwa mushipiditu binena’mba: “E-e! keo būya maulu pa ngulu a yewa uleta myanda-miyampe, mwine wela lubila lwa ndoe, uleta myanda miyampe ya dyese, wela lubila lwa lupandilo; unena ku Ziona amba: Leza obe wabikala!” (Is. 52:7) Twingidijei uno boloshile mupya mwanda wa kutwala myanda miyampe itamba kudi Leza ku bantu badi na kyumwa kya bubinebine mu wetu mwaba!

[Kapango pa paje 5]

Mu Kifuko Mudi Bantu Batatana Kwikala’ko kwa Leza ne Kupela Bible:

● Mu myaba imoimo, basapudi bamonanga’mba, kutela bishima “Leza” nansha “Bible” kwibakalakenyanga mīsambo. Mu myaba idi namino, kitatyi kyotwitana na muntu musunsa mubajinji, i biyampe kwisambila pa myanda isangela bantu mu mwaba pamo bwa buludiki umbikalo muyampe mukokeja kutana bukwashi buyampe mu bisaka, ne bitutengele kumeso. Kumeso kwa kulombola muntu boloshile, Myanda Miyampe i biyampe bidi kubandaula nandi misunsa mivule myanda itala kwikala’ko kwa Leza, ne yoya ilombola’mba Bible ufwaninwe kukulupilwa.

[Kapango pa paje 6]

Kitatyi Kyosapula ku Njibo ne Njibo:

● “Naiya kukupempula mwanda wa kukulombola muswelo upēla wa mwa kuyukila bisa kulongela bantu Leza ku meso’ku. Lelo kashā kodi mwiipangule shi Leza ukapwija masusu? [Muleke alondolole.] Uno boloshile ulombola i kwepi kokokeja kutana malondololo mu Bible ku kino kipangujo. [Mutambike boloshile ne kutanga nandi musango mubajinji wa mu kifundwa 1, pamo ne Yelemia 29:11.] Kukwatañana na bino byowatanga, le usangedile milangwe ya Leza ya’mba, twikale mu būmi buyampe kumeso’ku? [Muleke alondolole.] Shi uswile ukokeja kusela uno boloshile. Difuku dikwabo, tusakwiya kubandaula musango wa bubidi mwanda wa kutana malondololo mu Bible ku kino kipangujo, ‘I muswelo’ka ukapwija Leza byobya bileta masusu ku bantu?’” Shi mwinē njibo udi na kyaba’nka mu difuku dibajinji’dya, mukokeja kutanga ne kubandaula musango wa bubidi ne bisonekwa bisatu bidi’mo. Kadi mwilayei difuku dya kujoka kubandaula kipangujo kya bubidi mu kifundwa.

● “Bantu bavule basenswe kulombela, nakampata kitatyi kyobadi mu makambakano. Lelo nobe ulombelanga mu bitatyi bimobimo? [Muleke alondolole.] Molangila Leza wivwananga milombelo yo-yonso, nansha kudi mikwabo ya ketabijangapo? [Muleke alondolole.] Ngidi na boloshile uleta malondololo a Bible ku bino bipangujo. [Mutambike boloshile umo, mubandaule nandi pamo musango mubajinji wa kifundwa kya 12 kadi mutange nandi ne bisonekwa binenwe’mba, “tanga”.] Kumwenepo’mba i kya kutendelwa pa kuyuka’mba Leza udi na mutyima wa kwituteja? Ino pa kumwena ne pa mfulo mu milombelo, tusakilwa kuyuka Leza senene. [Putula pa kifundwa 2, umulombole tumitwe twa myanda.] Shi uswile nkokeja kukushila uno boloshile, nabya difuku dikwabo, tukatanga malondololo aleta Bible ku bino bipangujo bya mvubu.”

● “Naiya twisambe mwanda bavule badi na moyo, kebayukilepo kwenda ntanda’ku. Molangila ino ngikadilo imbi ya ntanda ikalongoloka? [Muleke alondolole.] Bantu batulumukanga pa kuyuka’mba mu Bible mudi myanda miyampe ileta lukulupilo. Tala bipangujo bimobimo bidi mu uno boloshile bilondolwelwe mu Bible.” Mutambike boloshile, umulombole atonge kipangujo kyasangela kutabuka pa byobya bidi pa nyuma pa kibalu. Shi watonge, twelai mu kifundwa, umulombole mwifundilwanga. Mwilayei difuku dya kubandaula kipangujo kilonda’ko.

[Kapango pa paje 7]

Tompa Musunsa Mubajinji:

● “Naiya twisambe bityetye, nkulombole muswelo mupya wa kwifunda Bible. Uno boloshile udi na bifundwa 15 bilombola kokokeja kutana malondololo mu Bible obe ku bipangujo bya mvubu mpata. [Mulombole bidi pa kibalu kya ñanjilo ne kya mfulo.] Le kodi mutompe kukimba kwivwanija Bible? [Muleke alondolole.] Uyukile, bino bifundwa bipēla pelē! [Bandaulai musango umbajinji udi munshi mwa kipangujo 3 mu kifundwa 3, mutange ne Kusokwelwa 21:4, 5. Shi kidi na mvubu, mukokeja, kubandaula ne musango ulonda’ko pamo ne bisonekwa bidi’mo binenwe’mba “tanga”.] Shi uswile ukokeja kushala na uno boloshile. Tukasangela kwifunda nobe Bible nansha’tu musunsa umo. Ino shi bibakusangaja tukendeleja. Difuku dikwabo nabya tukabandaula kifundwa kibajinji. Kino kifundwa kidi pa paje umo kete.”

[Kapango pa paje 7]

Ingidija’ye mu Kujokela’mo Kupya:

● Kitatyi kyojoka kumona boba basangedile musapu, ukokeja kunena’mba: “Nasangala mpata pa kwitana nobe monka. Nakuletela ne uno boloshile uleta malondololo a mu Bible ku bipangujo bivule bya mvubu mpata. [Mutambike boloshile, umunene atale pa kibalu kya mfulo.] Pa ino mitwe ya myanda i wepi owasangela kutabuka? [Muleke alondolole. Kupwa pūtula pa kifundwa kyaatonga’kya.] Nsaka nkulombole muswelo witukwasha uno boloshile mwa kutanina malondololo a mu Bible.” Mulombole mulongelwanga kifundwa, na kubandaula musango umo nansha ibidi ne bisonekwa binenwe’mba “tanga”. Kubapu, ubashilula kifundwa kya Bible mu muswelo upela! Mushile mwinē njibo boloshile, ne kwilaya nandi difuku dya kumujokela. Shi mubapu kifundwa, mukabandaula kifundwa kikwabo kikatonga mwinē njibo nansha kushilwila ku ngalwilo kwa boloshile.