Tufundijei na Boloshile Myanda Miyampe
1. Le boloshile Myanda Miyampe walupwilwe mwanda waka?
1 Monka mokilombwedilwe mu Mwingilo Wetu wa Bulopwe wa Kweji 7, mu bingidilwa bya mvubu bya kufundija nabyo mudi ne boloshile Myanda Miyampe Itamba Kudi Leza! Bisonekwa i bitelwe bitupu, kupitulukwa’mo mpika mwanda wa bantu basangele kutangidila’byo mu Bible. Uno boloshile i mwishile na bitabo bikwabo bilupulwanga mwanda wa muntu efunde aye mwine, ino aye walupwilwe mwanda wa kwifunda’ye na mufundiji. Nanshi kitatyi kyotwabanya’ye, tufwaninwe kulombola muntu mwifundilwanga amba amone mobitobela kwifunda myanda miyampe ya mu Bible.—Mat. 13:44.
2. Le i muswelo’ka otukengidija boloshile Myanda Miyampe mu kwitana kubajinji?
2 Mu Kwitana Kubajinji: Ubwanya kunena’mba: “Naiya kukupempula mwanda bantu beipangulanga kwenda ntanda i kwepi. Molangila, ngikadilo ya ino ntanda ikashinta? [Muleke alondolole.] Mu Bible mudi myanda miyampe itupa lukulupilo. Tala bipangujo bimo bilondolwele Bible.” Mutambike boloshile, ne kumunena atonge kipangujo pa kibalu kya panyuma. Kupwa ingidija musango umbajinji wa kifundwa’kya mwanda wa kumulombola mwifundilwanga. Nansha ipangula muntu kipangujo kisangaja kikwatañene na kifundwa kyotongele, ne kumulombola musa kumukwashisha boloshile atane malondololo a mu Bible. Basapudi bamo batādijanga ne video ya pa jw.org shi ikwatañene na kifundwa kyobesambila’po.
3. Shintulula mwa kwendejeja kifundwa na boloshile Myanda Miyampe.
3 Mwa Kwendejeja Kifundwa: (1) Tanga kipangujo kifīta kidi na kibalwa mwa kukwashisha muntu ate mutyima ku mwanda mukatampe. (2) Tanga musango ulonda’ko. (3) Tanga bisonekwa bisendeke, ne kwipangula bipangujo bilanguluja amba muntu amone muswelo ulondolola bisonekwa ku kipangujo kidi na kibalwa. (4) Shi kudi musango mukwabo, pituluka ditabula 2 ne 3. Shi video ikwatañene na kipangujo ne shi wadi kwatadije’yo mwinē njibo, nankyo kimba mukenga wa kumutadija’yo pomwisamba. (5) Ku mfulo, nena muntu alondolole ku kipangujo kidi na kibalwa mwa kuyukila shi wibivwene.
4. Le i kika kiketukwasha twingidije kino kingidilwa kilēme na manwa?
4 Wiibidije na kino kingidilwa kilēme. Ponso pomona mukenga, ingidija’kyo. Kumeso kwa kwifunda konso, langulukila pa mwifundi ne pa muswelo wa kulanguluka nandi na kwingidija bisonekwa bidi mu kifundwa. (Nki. 15:28; Bil. 17:2, 3) Poenda uvudija buyuki ne manwa, ukamona’mba uno boloshile i kingidilwa kiyampe kya kwingidija pa kufundija bantu bubine!