Tushilulei Bifundwa bya Bible mu Mukanda Kisaka Leza
1 Malapolo atamba koku ne koku pano pantanda ponso alombola’mba mukanda I Kika Kisaka Leza Kotudi? i kingidilwa kya bukomo kya kufundija nakyo bantu bubinebine. Kudi bifundwa tununu ne tununu bishilulwa ku yenga ne yenga mu uno mukanda. Lelo nobe kodi mubwanye kushilula ne kwendeja kifundwa kya Bible mu mukanda Kisaka Leza?
2 Basapudi bavule bapēlelwanga pa kupāna uno mukanda, ino bamobamo i bakomenwe kuyuka binenwa bya kutweja nabyo muntu mu kifundwa. Le boba bashilulanga bifundwa mu uno mukanda bebibwanyanga namani? Madingi alonda’ko akokeja kukukwasha.
3 Lombola mwifundilwanga: Kitatyi kyosapwila muntu dibajinji nansha kyomujokela’ko, kokanena mwinē njibo amba nsa kwiya tushilule kifundwa kya Bible kubapu, ino mulombole ne mwendejibwanga kifundwa kine. Kino kikatalula kwakamwa ne kutuyuka kutuyukanga bantu bavule kishima “kifundwa.” Shi uyuke kulombola mwifundilwanga, kubapu, ukanena’tu bishima bityetye, ne kushilwididila kifundwa.
4 Kwiteakanya Kudi na Mvubu Mpata: Pa kushilula bifundwa bya Bible na kyanga kilomba kwiteakanya kwetu nako kwikale kuyampe. Kwiteakanya kumeso kwa kitatyi kukatalula kwikaka konso kotukokeja kwikaka mu mwingilo wa kushilula ne kwendeja bifundwa bya Bible. Shi twingidije musapwilo umo misunsa mivule, tukapēlelwa pa kwisamba, tukanena motunenenanga nyeke, mu bishima bya batwe bene. Kino kekiketufukatyijapo mityima’nka batwe kete, mhm, kikatūkija ne mutyima wa mwinē njibo.
5 Powiteakanya, i biyampe uyuke ne bula bwa kitatyi kya ntwelelo yobe mwa kukayukijija’bo mwinē njibo pokamulombola mwifundilwanga. Tutu umo wafikile ku njibo, wetela, kupwa wanena’mba: “Naiya kukulombola motwifundilanga Bible na bantu. Nsa kukulombola mu minite itano kete. Lelo udi na kyaba kya minite itano nkulombole?” Kifundwa 1 mu mukanda Kisaka Leza kikokeja kulombolwa mu minite itano kete. Ino mukatanga bisonekwa bibala-binga mu kino kitatyi, shi mubapu kifundwa kibajinji mu ino minite mityetye, nabya ye kifundwa kya Bible kibajinji kyapwa mwinē njibo kwifunda. Ebiya mulombole amba posaka kwiya kwifunda nandi Kifundwa 2, mukefunda mu minite 15 kete.
6 Uno Musapwilo Walupwile Bipa Biyampe:
◼ “Nsakanga kukulombola mwifundilwanga Bible mu muswelo upēla, mu mafuku matyetye’tu, mu uno mukanda I Kika Kisaka Leza Kotudi? Kino kifundwa kilongwa mu minite 15 kete ku yenga, mu bula bwa mayenga 16, kekipe bantu bavule malondololo a mu Bible mashikate ku bipangujo bikatampe bya mu Bible pamo bwa kino.” Mulombole kifunka bya bukidibukidi. Kupwa pūtula pa Kifundwa 1, nena’mba: “Shi umpe’ko’tu minite itano, nsa kukulombola mwifundilwanga. Kifundwa 1 kidi na mutwe wa mwanda unena’mba ‘Muswelo Okokeja Kuyuka Kyokya Kisaka Leza.’ ” Tanga bipangujo bisatu, shintulula ne bibalwa bidi mu tupango. Tanga musāngo 1, lombola mwinē njibo mwa kusokwela malondololo. Pityila ku musāngo 2. Ukokeja kunena mwinē njibo eutange. Kupwa nena’mba: “Kukwatañana na byowatanga, ukokeja kulondolola namani ku kino kipangujo? [Tangulula kipangujo, leka mwinē njibo alondolole.] Ubamone amba musāngo ne musāngo udi na bisonekwa bikwatañene nao. Abyo byo bikupwila milangwe yetu ku malondololo aleta Bible ku bino bipangujo. Kifwa, tutange kisonekwa kya 2 Temote 3:16, 17, tutale shi kisa kubingija malondololo owaleta atala pa Mulembi mwine wa Bible.” Tanga musāngo 3, bandaula kipangujo ne kutanga Yoano 17:3. Kupwa kokela milangwe ya mwinē njibo ku buyuki bwaikala kala nabo na kupituluka Kifundwa 1. Ebiya pano pūtula pa Kifundwa 2, tanga kipangujo kya mfulo, “I miswelo’ka ibidi yotukokeja kwifunda myanda itala padi Leza?” Kupwa vuya na kumwipangula’mba: “Le i difuku’ka dyokekala’ko na minite 15 twiye twifunde Kifundwa 2 mwa kutanina malondololo?”
7 I kipite buya kupēleja mīsambo, ne kwanya mwinē njibo ponso pafwaninwe kumwanya. Pomwipa kilaeno mwa kwitanina monka, kokamunena’mba shi uswile twendelele nsa kwiya, ino mukankamike alonde momwalongela pano ku kifundwa kilonda’ko. Muyukije amba udi na kipyupyu kya kwiya kumupempula monka. Basapudi bamobamo betelekanga kwifundila ku telefone shi kitatyi kya kwitana kibakoma. Ukokeja ne kukankamika mwifundi atūle mukanda payampe, pokeoneka, mwa kwiukulumwina bukidi mu bupempudi bobe bukwabo.
8 Ikala na Kusumininwa: Kwiteakanya shako kudi na mvubu mpata, ino tufwaninwe ne kusumininwa mwa kwendelela na kifundwa. Kufundija kifundwa mu minite mityetye kukokeja kwikala kukomo, o mwanda ufwaninwe kusumininwa kwingidija musapwilo umo misunsa mivule, namino ukapēlelwa pa kulombola muntu mwifundilwanga. Tompa kulombola muntu ye-yense otana ku njibo, mu kipito, ne mu busapudi bwa ku telefone. Shi ukolelwanga pa kushilula kifundwa kya Bible, kokapungija mutyima. Ino shi usaka kwikibwanya, kikulomba usumininwe ne kwikala na mutyima wa kusaka kuyukija bakwenu bubinebine.—Ngat. 6:9.
9 Shi wingidije ano madingi, nobe ukokeja kwikala na madyese a kukwasha muntu kampanda olokele mu dishinda dya būmi, na kushilula ne kwendeja kifundwa kya Bible mu mukanda Kisaka Leza.—Mat. 7:14.