FPG/The Image Bank via Getty Images
KESHAI’NKA KUKESHA!
Bendeji ba Politike Abadyumuna Bantu pa Mwanda Utala Amakedona—Le Bible Unena’po Namani?
Mu Dya Mwanzo lubanga mafuku 10 Kweji 10, 2022, mabombe a mu Rusi aponene mu bibundi bya mu Ikrene mwanda wa kwaluja kinongo kya mabombe aonakenye kilalo kilunga Crimée na Rusi mafuku abidi ku nyuma. Bino binkumenkume byalongekele kitatyi kityetye kupwa’tu kwa bendeji ba politike kudyumuna bantu amba, panopano ponka divita dya Amakedona dibwanya kulongeka.
“Tamba mu mafuku a [Muludiki wa États-Unis John F.] Kennedy ne mu mafuku aelelwe mabombe mu Cuba, pano po potwafwena bininge ku Amakedona. . . . Nkilangapo amba bibwanika [kwingidija] mabombe a nyukilia kutanwa na Amakedona mpika.”—Muludiki wa États-Unis Joe Biden, mafuku 6 Kweji 10, 2022.
“Ngitabije amba pano’ko Amakedona keifika, kadi isa kulongeka ntanda yonso.”—Muludiki wa Ikrene Volodymyr Zelensky, pobamwipangwile pa bikalupuka ku kwingidija mabombe a nyukilia, mu BBC News, mafuku 8 Kweji 10, 2022.
Le bine kwingidija mabombe a nyukilia kukatwala ku Amakedona? Le Bible unena’po namani?
Le mabombe a nyukilia akalengeja kwikale Amakedona?
Mhm. Kishima “Amakedona” kitanwanga musunsa umo kete mu Bible, mu Kusokwelwa 16:16. Kekifunkilapo pa divita pa bukata bwa mizo, ino kifunkila pa divita pa bukata bwa Leza ne “balopwe ba ntanda yonso ikelwe na bantu.” (Kusokwelwa 16:14) Leza ukengidija divita dya Amakedona mwanda wa kufudija maludiki a bantu.—Danyele 2:44.
Shi usaka kuyukila’ko bivule pa bikalonga divita dya Amakedona pa ntanda, tanga kishinte kinena’mba, Le Divita dya Amakedona I Bika?
Le ntanda ne bekadi bayo bakonakanibwa ku divita dya nyukilia?
Mhm. Nansha shi bendeji abakengidija mwenda mafuku mabombe a nyukilia, Leza kakebalekapo bonakanye ntanda. Bible unena’mba:
“Ntanda ikele’ko nyeke.”—Musapudi 1:4.
“Boloke bakapyananga ntanda, kadi bakekalanga’po nyeke.”—Ñimbo ya Mitōto 37:29.
Inoko bupolofeto bwa mu Bible ne binkumenkume bilongeka dyalelo bilombola’mba, tubafwena bininge ku kushinta kukatampe kwa mu mānga ya muzo wa muntu. (Mateo 24:3-7; 2 Temote 3:1-5) Tala binena Bible pa mafuku a kumeso kupityila ku kifundwa kya Bible kya ku bitupu.