Le I Bika Bikalonga Bulopwe bwa Leza pa Bukomo Bwetu bwa Ngitu?

“Nansha shi COVID-19 keikidipo bu misongo ya ntanda yonso ilomba bundapi bwa bukidibukidi, ketufwaninwepo kulanga’mba keikidipo bu kyaka ku bukomo bwa ngitu bwa bantu ba ntanda yonso. Tubwanya kukulupila’mba kukekala kipupo kikwabo na kino mu mafuku a kumeso, o mwanda tufwaninwe kwiteakanya’ko.”—Dokitele Tedros Adhanom Ghebreyesus, mwimaniji mukatampe wa Kitango kya Ntanda Kitala Myanda ya Bukomo bwa Ngitu, 22 Kweji 5, 2023.

Bantu bavule bendelelanga kwikonda na makambakano a ku ngitu ne mu malango pa mwanda wa kipupo kya COVID-19. Le maludiki ne malongolodi atala bukomo bwa ngitu i meteakanye ku kipupo kikwabo kibwanya kwikala’ko, ne abwanya kwitukwasha mobifwaninwe ku misongo yotwikonda nayo dyalelo?

Bible witulombola umbikalo uketupa bukomo bwa ngitu buyampe. Unena’mba “Leza wa mūlu ukemika bulopwe,” nansha umbikalo. (Danyele 2:44) Mu uno umbikalo, “i kutupu mwikadi ukanena’mba: ‘Nabela.’” (Isaya 33:24) Muntu yense ukekala na bukomo bwa ngitu buyampe pamo bwa nkasampe.—Yoba 33:25.