Le Kalunganyembo I Bika? Le I Kifuko kya Masusu a Nyeke?

Bilondolola Bible

Malamuni amo a Bible i malamune kishima kya Kihebelu “Sheole” ne kya Kingidiki “Hadese” bu “kalunganyembo,” abyo byonso bibidi bifunkila pa kibundu mujīkwanga bantu bonso. (Ñimbo ya Mitōto 16:10; Bilongwa 2:27) Bantu bavule bakulupile mu kalunga nyembo ka mudilo, monka mobilombwedilwe pa kifwatulo kya bipwilo kidi mu kino kishinte. Inoko, Bible aye ufundija bintu bishile.

1. Boba badi mu kalunganyembo kebayukilepo kintu nansha kimo kadi kebabwanyapo kwivwana misanshi. “Kekudipo mwingilo nansha kufwatakanya bintu, nansha buyuki nansha tunangu mu Sheole.”—Musapudi 9:10.

2. Bantu bayampe bendanga mu kalunganyembo. Yakoba ne Yoba bantu ba kikōkeji bādi batengele kwenda’mo.—Ngalwilo 37:35; Yoba 14:13.

3. Lufu i mfuto ya bubi, ke masusupo a mu kalunganyembo ka mudilo. “Yewa wafwa watalulwa mambo a bubi bwandi.”—Bene Loma 6:7.

4. Lufundijo lwa masusu a nyeke lujilulanga boloke bwa Leza. (Kupituluka mu Bijila 32:4) Pājilwile Adama, muntu mubajinji, Leza wāmulombwele amba mfuto yandi i lufu, wāmunena’mba: “Wi luvumbi kadi ukajokelanga ku luvumbi.” (Ngalwilo 3:19) Shi bine Leza wāelele Adama mu kalunganyembo ka mudilo, nabya wādi wa kubepa bubela.

5. Leza kalangile nansha dimo kupa bantu mfuto ya kwibasusula nyeke. Mulangwe wa amba Leza upanga bantu mfuto na kwibela mu kalunganyembo ka mudilo keukwatañenepo na bufundiji bwa mu Bible bwa amba “Leza i buswe.”—1 Yoano 4:8; Yelemia 7:31.