BIPANGUJO BYA BANKASAMPE
Le Nkalonga Namani shi Mulunda Nami Waunsanshija?
Byofwaninwe kuyuka
Yuka’mba i kutupu kipwano nansha kimo kekikalangapo na makambakano. Mulunda nobe muyampe byadi wampikwa kubwaninina—nansha shi umunonanga bu mulunda nobe wa pa mutyima—ubwanya kukusanshija mu bilongwa nansha mu binenwa. Na bubine, banwe bonso bubidi mwi bampikwa kubwaninina. Wibandaule bidi, shi uvuluke biyampe, le kasha kwasanshije muntu nansha umo?—Yakoba 3:2.
Ne byokekudi Entelenete i bipēla muntu kukusanshija. Kimfwa, nkasampe umo witwa bu David unena’mba: “Shi ubamone pa Entelenete mafoto a balunda nobe besangaja, ubwanya kwiipangula mwanda waka kebakwityile’kopo. Kino kibwanya kukusansa bininge ne kukulengeja wimone bu i bakusūle.”
Ubwanya kwifunda mwa kupwijija uno mwanda.
Byobwanya kulonga
Wibandaule. Bible unena’mba: “Kokapēlakana kuloba, mwanda bulobo i kiyukeno kya bulembakane.”—Musapudi 7:9, kunshi kwa dyani.
“Kyaba kimo i enka shi pabapite mafuku, ebiya koivwanija’mba walobele’tu pampikwa mwanda.”—Alyssa.
Languluka: Le kwijangapo kuloba? Le ubwanya kwifunda mwa kutūkijija bakwenu mutyima pa kubulwa kubwaninina kwabo?—Musapudi 7:21, 22.
Tala byabuyabuya bidi mu kulekela. Bible unena’mba muntu ūsula “kilubo i buya kwadi.”—Nkindi 19:11.
“Nansha shi abe ye udi na bubinga, i biyampe kulekela na mutyima umo, ko kunena’mba kufwaninwepo kwendelela kumuvuluja’byo mwanda wa anze kukulomba lusa kyaba ne kyaba. Shi ubalekela muntu, bibapite kubapu.”—Mallory.
Languluka: Le mwanda obakulubile i mukatampe bininge? Le ubulwe’po kumulekela mwanda wa mwikale mu ndoe?—Bene Kolose 3:13.
Kwisambila pa kanda ne kanda mu bulunda, kudi pamo bwa kushitula kibelo kitatyi ne kitatyi mwanda wa mashika atwele mu kyumba mudi kakyanga kayampe
Langila mukwenu. Bible unena’mba: “Kemwakitai mutyima enka ku tumweno twa banwe bene, ino i ne ku tumweno twa bakwenu.”—Bene Fidipai 2:4.
“Shi mwisenswe ne kwilēmeka mu bulunda bwenu, nabya mukapēlelwa kupwija myanda bukidibukidi mwanda banwe bonso mwi bepāne mu bulunda’bwa. Byemulombele bukomo pa kupwana uno muswelo, o mwanda kemusakilepo kutyiba kino kipwano.”—Nicole.
Langulukila pa kino: Le wabulwa’po kumona bintu biyampe mu bilanga mukwenu?—Bene Fidipai 2:3.
Mu kīpi: Kuyuka bya kulonga shi muntu wakusanshija i bwino bukakukwasha enka ne pokatama. Penepo, le wabulwa’po kwifunda’bo tamba’nka pano?