Ñimbo ya Mitōto 23:4—“Nansha Mpite mu Musanza wa Munjiñininya Mukatampe”

“Nansha mpite mu musanza wa munjiñininya mukatampe, nkityinangapo kibi nansha kimo, mwanda abe udi nami; lusonde lobe ne mukombo obe binkulupijanga.”—Ñimbo ya Mitōto 23:4, Bwalamuni bwa Ntanda Mipya.

“Nansya si naenda ku kipakasa kya mfindi ne lufu, nkikacina po kibi nansya kimo, mwanda abe udi nami: kamama kobe ne mukombo obe binkankamika.“—Ñimbo ya Mitōto 23:4, Bisonekwa Bitokele.

Nshintulwilo ya Ñimbo ya Mitōto 23:4a

Boba batōta Leza, wibakiñanga nansha ke kitatyi kyobadi mu ngikadilo mikomo. Uno vese i mudingakanye muswelo ukwatakanyanga Yehova batōtyi bandi na mulaminwanga mukōko na mukumbi.b Kebemonanga’po bu badi bunka kitatyi kyobatanwa na bikoleja bitelelwe mu uno vese bu kifuko kya munjiñininya mukatampe, nansha kya fukutu ne kyaka kya lufu. Bemonanga bu i balamwe senene, wita’mba Leza udi pamo nabo.

Mu bitatyi byālembelwe Bible, mukumbi wādi ubwanya kwingidija umpebwe mwanda wa kukinga mikōko ku banyema ba budyani. Wādi wingidija ne mukombo wandi, mwine wādi divule dine mutyi mulampe mwitonte ku mfulo imo, mwanda wa kuludika nao mikōko senene ne kwiikinga ku byaka. Mo monka ne Yehova Leza udi pamo bwa mukumbi wa buswe mwine ukinga ne kuludika boba bamutōta. Nansha ke mu mafuku mabimabi mwine, Yehova wibakwatakanyanga mu miswelo mishileshile.

• Wibafudijanga ne kwibasenga kupityila ku Kinenwa kyandi Bible.—Bene Loma 15:4.

• Utejanga milombelo yabo ne kwibapa ndoe mu ñeni ne mu malango.—Bene Fidipai 4:6, 7.

• Wingidijanga batōtyi-nabo mwanda wa kwibakankamika.—Bahebelu 10:24, 25.

• I mwibape lukulupilo lwa kutendelwa lwa būmi bwa kumeso buyampe, kitatyi kyakatalula’ko bintu byonso bibasusulanga dyalelo.—Ñimbo ya Mitōto 37:29; Kusokwelwa 21:3-5.

Ngikadilo yālembelwe’mo Ñimbo ya Mitōto 23:4

Ñimbo ya Mitōto 23 yālembelwe na Davida, mwine wādi mukumbi wa mikōko pa bunkasampe bwandi, ne mwenda mafuku wāikele ke mulopwe wa muzo wa Isalela wa kala. (1 Samwele 17:34, 35; 2 Samwele 7:8) Uno mutōto ushilula na kulombola amba Yehova udi pamo bwa mukumbi mwine uludika, udisha ne kukankamika batōtyi bandi, pamo’nka na mukumbilanga mukumbi mikōko.—Ñimbo ya Mitōto 23:1-3.

Mu Ñimbo ya Mitōto 23:4, pa kukomeneja pa bulami bwa Leza, Davida umutela na bwa aye muntu wa bubidi (abe), pa kyaba kya kumutela bu muntu wa busatu (aye). Kuno kushinta kutyetye, kulombola mwādi mupwanine bininge Davida na Yehova. Davida wādi uyukile amba Leza wādi umutele mutyima kadi wādi umwene makambakano onso awādi wikonda nao. O mwanda mwine Davida kātyininepo kibi nansha kimo.

Mu mavese abidi alonda’ko a Ñimbo ya Mitōto 23, vese 5 ne 6, Davida udingakanya’mo Leza na muntu utundaila mweni wandi, pa kyaba kya mukumbi na mikōko yandi. Pamo bwa muntu wa kizaji, Yehova wāikele na Davida pamo bwa mweni wandi mulēme mpata. Enka ne balwana na Davida bene kebādipo na bukomo kumulengeja aleke kwimwena bukwashi bwa Leza. Ku mfulo kwa uno mutōto, Davida unena na kikulupiji amba Leza ukekala nandi biyampe ne kumusanswa mu būmi bwandi bonso.

Binenwa bya kudingakanya nabyo bingidijibwe mu Ñimbo ya Mitōto 23 bilombola muswelo wendelelanga kukwatakanya Leza batōtyi bandi.—1 Petelo 2:25.