Ñimbo ya Mitōto 46:10—“Kōkelai Kadi Yukai Amba Amiwa Ne Leza”

“Kōkelai kadi yukai amba amiwa ne Leza. Nkazunzulwanga mu bukata mwa mizo; nkazunzulwanga pa ntanda.”—Ñimbo ya Mitōto 46:10, Bwalamuni bwa Ntanda Mipya.

“Tulai bya bulwi, yukai amba ami nne Leza! Nasinde mizo, nasinde ne ntanda.”—Ñimbo ya Mitōto 46:11, Bisonekwa Bitokele.

Nshintulwilo ya Ñimbo ya Mitōto 46:10

Leza usoñanya muntu ne muntu amutōte ne kwitabija lupusa lwandi lwa kuludika ntanda. Bukomo ne lupusa lwandi i bya binebine, kintu kifwaninwe kuyuka muntu ense usaka kwikala mūmi nyeke.—Kusokwelwa 4:11.

“Kōkelai kadi yukai amba amiwa ne Leza.” Malamuni amo a Bible i malamune kipindi kibajinji kya uno musemwa amba “ubai talala.” Kino i kilengeje bantu bakomenwe kwivwanija uno musemwa na kumona’mba, i musoñanya ulomba kwikala belēmeke nansha kwikala talala mu kipwilo. Inoko mulongo wa mu Kihebelu walamwinwe amba “kōkelai kadi yukai amba amiwa ne Leza” i kidyumu kipa Yehovaa Leza bantu ba mizo yonso, wibasoñanya baleke kumulwa ino betabije amba i enka aye ufwaninwe kutōtwa.

Kidyumu kikwabo kiifwene na kino kitanwa mu Ñimbo ya Mitōto 2. Muno, Leza i mulaye kukonakanya balwana nandi. Ku mutamba mukwabo, boba betabije buludiki bwa Leza bakimbanga bwendeji bwandi, bukomo ne tunangu. Badi na nsangaji ne na mutyima-ntenke mwanda ‘banyemenanga kwadi,’ nakampata pobadi mu bitatyi bikomo.—Ñimbo ya Mitōto 2:9-12.

“Nkazunzulwanga mu bukata mwa mizo; nkazunzulwanga pa ntanda.” Mu kyaba kya kala, Yehova Leza wādi uzunzulwa kitatyi kyaādi wingidija bukomokomo bwandi mwanda wa kukūla bantu bandi. (Divilu 15:1-3) Mu mafuku a kumeso, Yehova ukazunzulwa mu ludingo lwa peulu bininge kitatyi kikakōkela muntu ense pano pa ntanda lupusa lwandi ne kumutōta.—Ñimbo ya Mitōto 86:9, 10; Isaya 2:11.

Ngikadilo Yālembelwe’mo Ñimbo ya Mitōto 46:10

Kingidilwa kya kunyemena’ko kimo kita Lwimbo lwa Mitōto 46 bu “lwimbo lutumbija bukomo bwa Leza, nkomokomo mwine ulwilanga bantu bandi.” Kitatyi kyādi kimba bantu ba Leza Lwimbo lwa Mitōto 46, bādi balombola kikulupiji kyobādi nakyo mu bukomo bwa Yehova bwa kwibakinga ne kwibakwasha. (Ñimbo ya Mitōto 46:1, 2) Binenwa bya luno lwimbo byādi bibavuluja’mba Yehova udi nabo nyeke.—Ñimbo ya Mitōto 46:7, 11.

Pa kukomeja kikulupiji kyabo mu bukomo bwa Yehova Leza bwa kwibakinga, uno mutōto wādi wibakwasha balangulukile pa bilongwa byandi bya bukomo byawādi kala ke mulonge. (Ñimbo ya Mitōto 46:8) Nakampata lwādi lwibakwasha bate mutyima ku bukomo budi na Yehova bwa kufudija divita. (Ñimbo ya Mitōto 46:9) Mu bitatyi byālembelwe Bible, Yehova wāfudije mavita mu muswelo kampanda, na kukinga bantu bandi ku mizo yādi ibatamba divita. Ino kadi Bible i mulaye amba panopano ponka Leza usa kulonga’kyo mu ludingo lukatampe, pasa kufudija mavita pa umbuo onso wa ntanda.—Isaya 2:4.

Le Yehova wendelelanga na kukwasha batōtyi bandi dyalelo? En-en. Mutumibwa Polo wākankamikile bininge bene Kidishitu balombe bukwashi Kwadi. (Bahebelu 13:6) Myanda idi mu Ñimbo ya Mitōto 46 ikomejanga kikulupiji kyotudi nakyo mu bukomo bwa Leza bwa kwitukinga. Itukwashanga tumone Leza bu “kinyemeno kyetu ne bukomo bwetu.”—Ñimbo ya Mitōto 46:1.

Tala ino video mīpi ilombola myanda mikatampe idi mu mukanda wa Ñimbo ya Mitōto.