Yoano 14:27—“Nemushila Ndoe”

“Nemushila ndoe; nemupe ndoe yami. Nkimupele’yopo na mupāninanga’yo ino ntanda. Kemwakivutakanyai mityima yenu nansha kwiileka izakale moyo.”—Yoano 14:27, Bwalamuni bwa Ntanda Mipya.

“Nemushila ndoe, nemupe ndoe yami. Nkimupele’yo’po na mupelañena’yo ba pano pa ntanda. Mityima yenu keikivutakana ne kukwatwa moyo.”—Yoano 14:27, Dibuku Dijila.

Nshintulwilo ya Yoano 14:27

Na bino binenwa, Yesu wākulupije na kyanga batumibwa bandi amba kebadipo na kya kuzumbijija mutyima bipitepite shi abatanwa na bikoleja. Pamo bwa Yesu, abo nabo bādi babwanya kulama ndoe ya mutyima na bukwashi bwa Leza.

Le i ndoe ya muswelo’ka yāshidile Yesu balondi bandi, nansha’mba yaēbapele? Yesu wēbashidile ndoe yandi, ndoe mine yawādi nayo ne aye. Ino ndoe keyādipo ya amba kekukidipo mavita nansha kususulwa. (Yoano 15:20; 16:33) Nansha Yesu byaādi ulongelwa bintu na bukondame bine byādi bya kumutwala ne ku kwipaibwa, wādi na ndoe mu mutyima ne mu ñeni. (Luka 23:27, 28, 32-34; 1 Petelo 2:23) Wādi talala nyā munda mwandi mwanda wādi uyukile amba, Shandi Yehova umusenswe kadi umuloelelwe.a—Mateo 3:16, 17.

Yesu wāpele bandi batumibwa ndoe na kwibakulupija amba, aye ne Shandi bebasenswe kadi bebaloelelwe. (Yoano 14:23; 15:9, 10; Bene Loma 5:1) Ino ndoe īmanine pa lwitabijo lwabo mudi Yesu bu Mwanā Leza, yādi ibakwasha baleke kwikala na moyo ne na malangalanga. (Yoano 14:1) Nansha Yesu byakādipo wa kwikala pamo nabo bya mpala na mpala, wālaile amba mushipiditu ujila wa Leza ukebakwasha bekale na kikulupiji ne na ndoe ya munda. (Yoano 14:25-27) Balondi ba Yesu bādi ba kulwa na bikoleja na bukankamane, mwanda bādi bayukile amba Yehova wibetabije ne kwibakwatakanya.—Bahebelu 13:6.

Pādi Yesu pano pa ntanda, bantu bādi na kibidiji kya kwisakila ndoe umo ku mukwabo pobādi beimuna. (Mateo 10:12, 13) Pano Yesu kādipo’tu usakila batumibwa bandi ndoe; ino wēbapele’yo. Ne kadi ndoe yēbashidile Yesu, i mishile na ndoe yo-yonso ibwanya kupāna ntandab. Ntanda ibwanya kupa muntu ndoe kampanda kupityila ku kipwano, bupeta, kuyukana, nansha kitenta. Inoko ndoe ya Yesu ke ya panjapo. I ndoe ya munda ya nyeke.

Ngikadilo yānenenwe’mo binenwa bidi mu Yoano 14:27

Yesu wānenene bino binenwa ku batumibwa bandi ba kikōkeji bufuku bubadikile lufu lwandi. Bufuku’bwa, wēbalombwele amba panopano ponka usa kwibashiya. (Yoano 13:33, 36) Uno mwanda wāpele bandi bana ba bwanga bulanda. (Yoano 16:6) O mwanda Yesu wēbakulupije na kwibalombola bubinga bokebādipo bafwaninwe kuvutakanibwa ñeni pa mwanda wa lwendo lwandi.

Binenwa bya Yesu bibwanya kukankamika ne bene Kidishitu dyalelo. Tubwanya netu kwikala na ndoe. (2 Bene Tesalonika 3:16) Potwikala balondi ba Yesu, twifundanga amba, Yesu ne Shandi Yehova betuswele kadi betuloelelwe. (Bene Kolose 3:15; 1 Yoano 4:16) O mwanda ketudipo na kya kuzumbijija mutyima bipitepite. Mwanda waka? Mwanda Leza udi ku mutamba wetu.—Ñimbo ya Mitōto 118:6; Bene Fidipai 4:6, 7; 2 Petelo 1:2.

Tala ino video mīpi, umone myanda mikatampe idi mu mukanda wa Yoano.