Bukomo bwa Ngitu
Bible ke dibukupo dya kiñanga. Inoko, dilombolanga mwa kwikadila na būmi buyampe. Tala misoñanya imoimo ya mu Bible ibwanya kulumbulula bukomo bobe bwa ngitu.
TÁ MUTYIMA KU UMBIDI OBE
MUSOÑANYA WA MU BIBLE: “I kutupu muntu ushikilwe umbidi wandi aye mwine, ino wiudishanga ne kwiulela na buswe.”—Bene Efisesa 5:29.
MOUSHINTULWILA: Uno musoñanya wa mu Bible witukankamika twikankile’ko kuta mutyima ku bukomo bwetu bwa ngitu. Bwifundi bumo bulombola’mba, misongo mivule itambanga ku butongi botutonga mu būmi. Nanshi, kutonga butongi buyampe kubwanya kwitukwasha twikale bakomo ku ngitu.
BYOBWANYA KULONGA:
Byakudya. Longa bukomo bwa kudya byakudya biyampe ne kutoma mema mangi.
Ingila. Mingilo ya makasa ibwanya kukukwasha wikale mukomo nansha shi udi na myaka’ka, mulemane, nansha shi ubelanga misongo keipu. Nansha bantu bosenswe ne bamuñanga byobabwanya kukukankamika wikale na kibidiji kya kwitamuna bidyoma, ino abe mwine ye wakulonga’po kintu!
Lāla Bininge. Muntu kalālapo bininge udi mu kyaka kya kubela misongo mikatampe. Pa mwanda wa butongi bobatonga, bantu bavule kebalālangapo bininge. Inoko, shi ulāle bininge, nabya ukekala na būmi buyampe.
LEKA BIBIDIJI BIBI
MUSOÑANYA WA MU BIBLE: “Twitōkejei ku byonso bisubija ngitu ne mushipiditu.”—2 Bene Kodinda 7:1.
MOUSHINTULWILA: Tumwenanga’mo potuleka kona umbidi wetu na bintu byona ngitu pamo bwa mfwanka, mine iyukene bu kintu kikatampe kileta misongo ne lufu.
BYOBWANYA KULONGA: Witungile difuku dya kuleka’yo ne kutūla’po kayukeno mu kalandadiye. Kumeso kwa dino difuku, sumbula bilole byodi nabyo, bininga, alumete, ne bintu byonso byoingidijanga mu kino kibidiji kibi. Kokyenda ku bifuko kudi bantu badi na bino bibidiji bibi. Sapwila’mo balunda babwanya kukukwasha.
MISOÑANYA MIKWABO YA MU BIBLE
Shi usaka bakupe Bible, enda kudi Kamoni wa Yehova wa mu kyenu kibundi
TÁ MUTYIMA KU BYAKA.
“Shi koubaka njibo mipya, ufwaninwe kulonga ne kalupango pa musaka obe, kutyina’mba wakaleta mambo a mashi pa njibo yobe mwanda muntu ubwanya kupona’po.”—KUPITULUKA MU BIJILA 22:8.
TALAJA BULOBO BOBE.
“Yewa wija pa kukwatwa bulobo udi na kusansanya kukatampe, ino yewa wampikwa kitūkijetyima ulombolanga patōka bulembakane bwandi.”—NKINDI 14:29.
LEKA MUDYOPOLO.
“Kokekala . . . mu bukata mwa boba badyadyadya.”—NKINDI 23:20.