Būmi bwa Kisaka ne Bulunda
Bavule bakomenwanga kulama kipwano kyobapwene na bantu. Tala misoñanya ya mu Bible ibwanya kukukwasha wikale biyampe na bantu.
LEKA KWISAKILA
MUSOÑANYA WA MU BIBLE: “Kemwakitai mutyima enka ku tumweno twa banwe bene, ino i ne ku tumweno twa bakwenu.”—Bene Fidipai 2:4.
MOUSHINTULWILA: Tubwanya kwikala mu kipwano kiyampe na bantu shi tupāna pa kyaba kya kutengela betupe. Shi udi na kwisakila, ubwanya kona kipwano kyopwene na bakwenu. Kimfwa, mulume nansha mukaji wisakila ubwanya kutomboka mwinē pandi. Kadi i kutupu muntu usakanga kupwana na muntu wianinya bintu byadi nabyo nansha byayukile. O mwanda dibuku dimo (The Road to Character) dinena’mba, “bantu betele mutyima abo bene bafulanga kubi.”
BYOBWANYA KULONGA:
Kwasha bakwenu. Bantu bapwene bininge i boba beivwanika ne kwikulupila. Bukimbi bumo bulombola’mba bantu bakwasha bakwabo kebavudilepo kunyoñama pa mutyima kadi bekalanga na kikulupiji.
Witūle pa kyaba kya bakwenu. Kwitūla pa kyaba kya muntu i kushintululwe bu kwivwana misanshi yandi mu mutyima obe. Shi witūla pa kyaba kya bakwenu kukanenapo binenwa bitapa, ko kunena’mba, binenwa bya mizaulo bya kusanshija muntu.
Shi witūla pa kyaba kya bakwenu, uketabija ne bisaka bakwenu. Nanshi kwitūla pa kyaba kya bakwenu kubwanya kukukwasha uleke mboloji, kadi ukapwana na bantu ba bibidiji ne ngikadila mishileshile.
Pityija nabo kitatyi pamo. Shi upityija na bakwenu kitatyi kivule, ukebayuka senene. Ufwaninwe kwisamba na bakwenu biyampe pa kupwana nabo. Nanshi ikala mwivwaniki muyampe. Tá mutyima ku makambakano a mulunda nobe. Bwifundi bwa panopano bunena’mba “mīsambo miyampe isangajanga bantu.”
TONGA BALUNDA NA TUNANGU
MUSOÑANYA WA MU BIBLE: “Kupwana na babi kubolejanga ngikadila miyampe.”—1 Bene Kodinda 15:33, kunshi kwa dyani.
MOUSHINTULWILA: Bantu bopityija nabo kitatyi badi na lupusa podi—luyampe nansha lubi. Befundi ba mwikadila wa bantu betabije amba luno lupusa lubwanya kushinta būmi bobe. Kimfwa, banena’mba shi upwene na bantu batoma mfwanka nansha belubule, ubwanya padi kushilula kutoma mfwanka nansha kukimba kwilubula.
BYOBWANYA KULONGA: Pwana na bantu badi na ngikadila ne misoñanya yosangela nansha yosaka kwiula. Kimfwa, pwana na bantu badi na bunwa, bulēme, buntu ne kizaji.
MISOÑANYA MIKWABO YA MU BIBLE
Tala mavideo esambila pa Bible alupwilwe mwanda wa kukwasha besongele, bankasampe, ne bana balumbulule būmi bwabo bwa kisaka
LEKA MUNENENO USANSA.
“Binenwa byampikwa kulanga bidi pamo bwa kusaba kwa kipete.”—NKINDI 12:18.
IKALA NA BUNTU.
“Muntu wa buntu ukamona biyampe.”—NKINDI 11:25.
MONA BAKWENU MOSAKILA BAKUMONE.
“Bintu byonso byomusaka bantu bemulongele, banwe nenu mufwaninwe kwibalongela’byo.”—MATEO 7:12.