4. Le Twāpangilwe Mwanda Wa Kususuka?

Kikadile Malondololo na Mvubu

Malondololo a kino kipangujo adi na lupusa pa muswelo otumona būmi.

Languluka’po Bidi

Le bidi na buluji Leza mwine wāpangile bintu bilumbuluke mu ino ntanda etupe būmi bwa masusu?

Bantu bampikwa kwitabija bamwene amba masusu i bubinga bwa kutatena milangwe ya Leza, ne kwikala’ko kwandi. Bakulupile amba masusu i kilomboji kya amba, (1) Leza kadipo na bukomo bwa kwiapwa, (2) Leza kasakilepo kwiapwa, ne amba (3) Leza kadi’kopo.

Le buno bo bubinga bwine bwikadile’ko masusu?

Binena Bible

Leza kētupangilepo mwanda wa kususuka.

Usakanga tusangēle būmi.

“I kutupu kintu kipityile buya kobadi kutabuka kusangala ne kulonga biyampe mu būmi bwabo, kadi amba muntu ense adye, atome ne kusangela mwingilo wandi onso mukomo. I kyabuntu kya Leza.”​—MUSAPUDI 3:12, 13.

Leza wāpele bantu babidi babajinji būmi bubwaninine.

Kēbapangilepo abo ne babo bana mwanda wa basusuke.

“Leza wēbanena’mba: ‘Butulai mwivudijei, muyuje ntanda ne kwiinekenya.’”​—NGALWILO 1:28.

Bantu babidi babajinji bātombokēle Leza.

Kupwa bēletela masusu ne kuletela’o babo bana bonso.

“Monka mwātwelele bubi mu ino ntanda kupityila ku muntu umo ne lufu kupityila ku bubi, mo mwasambakenine ne lufu ku bantu bonso mwanda bonso balongele bubi.”​—BENE LOMA 5:12.a

Leza kētupangilepo mwanda wa twiendeje batwe bene.

Monka moketubwaninyapo kwikala mu mema, ketwāpangilwepo mwanda wa kwiendeja batwe bene.

“Muntu wenda kadipo na lupusa lwa kōlola ditabula dyandi.”​—YELEMIA 10:23.

Leza kasakengapo tususuke.

Usakanga twikale na būmi bwampikwa makambakano.

“Yō, shi watele’tu mutyima ku mbila yami! Longa ndoe yobe yadi ya kwikala pamo bwa munonga.”​—ISAYA 48:18.