Yuka Bubine

Mwanda

Divule dine baboololanga bantu pa myanda’tu ya bubela. Langulukila pa bino bimfwa:

Bakulu ba twaji bamo balañanga bya bubela’mba bana-bakaji kebabwanyapo kwingila twaji tulomba kwingidija bwino, bukomo ne ñeni.
Mu Bulaya bwa pa kala, bādi batopeka Bayuda bya bubela’mba belanga sumu mu mishimwa ne kuzambalaja misongo. Mu buludiki bwa Nazi, bābepele Bayuda monka. Ino bwādi bubela bwa amba balengejanga lupeto lukome mu Alemanye. Buno bubela bonso bubidi bwālengeje bantu bekale na mboloji mikatampe pa Bayuda, kadi imo ikidi’ko ne dyalelo.
Bantu bavule bafulanga ku kunena bya bubela’mba, muntu ense udi na bulema udi bya bulanda kadi kilobo.

Bantu bakulupile ino mfumo babwanya’nka ne kutela bimfwa nansha kufwatakanya bubinga bwa kwikadila na mboloji. Kadi balañanga’mba muntu yense upatanya byobanena, kayukilepo kintu.

Musoñanya wa mu Bible

“Muntu wampikwa buyuki ke muyampepo.”—NKINDI 19:2.

Le ushintulula bika? Shi ketuyukilepo bubine, tukakwata butyibi bubi. Shi tukulupile mfumo pa kyaba kya bubine, tukamona bantu bibi.

Kuyuka bubine kukwashanga

Shi tuyukile bubine pa bantu, padi ketukakulupilapo mfwatakani ya bubela itumbile pa bantu’ba. Kadi kitatyi kyotukayuka’mba i betulombole bya bubela pa bantu kampanda, padi tukapela kwitabija myanda ya kufwatakanya yobanena bantu bakwabo.

Kimfwa Kimweke: Jovica (Balkans)

Jovica, utelelwe kala mu bino bishinte, paatamine wadi wivwana bantu mu yabo ntanda, mu mapya, ne ku televijo besamba myanda mibi pa bantu kampanda. Unena’mba, “naikele na mboloji bininge—enka ne kushikwa bano bantu. Kadi nadi nanga’mba ngidi na bubinga bwa kwibashikilwa.

“Inoko kitatyi kyonatwelele bu sola, nadi nenwe kushikata ne kwingila na basola bakwetu ba ku bene bantu’ba. Mu kino kitatyi, nayukile bintu bivule pobadi. Nashilula ne kwifunda lwabo ludimi ne kwivwana ñimbo yabo. Nashilula kusangela kwikala nabo, kadi nebamona muswelo mukwabo. Ino nadi ndyukile amba milangwe ya mboloji ibwanya kunjokela. O mwanda nalekele’byo kwivwana mapya esambila pa myanda mibi ya kabila ka bantu. Kadi nkyadipo nekitala mafilime nansha mizaulo ya kwibafutulula. Ndyukile amba mboloji ibwanya kuleta bulobo ne mushikwa.”

Byobwanya Kulonga

Vuluka’mba ngikadila mibi yobatelela bantu kampanda mu kikonge, ke abo bonsopo badi nayo.
Yuka’mba kuyukilepo padi myanda yonso itala bantu bakwabo.
Longa bukomo bwa kukimba bubine ku nsulo ikulupilwa.