Muswelo wa Kusangela Byobya Byotudi Nabyo

Ingila na Kininga

“Engile bikomo, wingila mingilo miyampe na makasa andi, amba amone kintu kya kwabila’ko yewa mufudilwe.”​—BENE EFISESA 4:28.

Umpangi wetu witukankamika twikale na mumweno muyampe pa mingilo. Mwanda waka? Muntu wingila bininge wikalanga na nsangaji mwanda ubwanya kusokola bisakibwa byandi ne bya kyandi kisaka. Ubwanya’nka ne kukwasha muntu mufudilwe. Kadi mukulu wandi wa kaji ukamusanswa. O mwanda mwingidi muyampe kebabwanyapo padi kumutalula pa kaji. Bisonekwa bitela mpalo yobapalanga muntu wingila bininge bu “kyabuntu kya Leza.”​—Musapudi 3:13.

Ikala Wampikwa Budimbidimbi

“Tukulupile amba tudi na mutyima wa mundamunda wampikwa budimbidimbi, byotusaka kwiendeja kwampikwa budimbidimbi mu byonso.”​—BAHEBELU 13:18.

Shi ketudipo na budimbidimbi tukekala belēmeke, tukekala na ndoe ya mutyima, kadi tukalāla tulo tuyampe. Ne kadi bakwetu baketukulupila ne kwitulēmeka. Bantu ba budimbidimbi besuminwanga bino bintu byonso biyampe. Kadi mutyima wabo wa mundamunda ubwanya padi kwibatopeka ne kadi babwanya kwikala kitatyi kyonso na moyo wa amba, difuku dimo babwanya kukebasokwela patōka.

Ikala na Mumweno Muyampe pa Lupeto

“Mwikadilo wa būmi bwenu wikale wa kubulwa kusanswa lupeto, koku musangela bintu bidi’ko pano.”​—BAHEBELU 13:5.

Tusakilwanga lupeto lwa kupota nalo bya kudya ne bisakibwa bikwabo. Inoko “kusanswa lupeto,” i kyaka kikatampe. Kubwanya kulengeja muntu engidije kitatyi kivule ne bukomo bwandi bonso mwanda’tu wa kukimba lupeto luvule. Kukimba lupeto uno muswelo kubwanya kuleta kavutakanya mu busongi, kumudīla kitatyi kya kushikata na bana, enka ne kumubeleka. (1 Temote 6:9, 10) Ne kadi muntu usenswe lupeto ubwanya kwikala na budimbidimbi. Muntu umo wa tunangu wānenene amba: “Muntu mukōkele ukamona madyese mangi, ino yewa upēlakana kukimba bupeta kakekalapo wampikwa mambo.”​—Nkindi 28:20.

Tonga Bufundiji Buyampe Bininge

“Lama tunangu twa kamweno ne bukomo bwa kulanga.”​—NKINDI 3:21.

Bufundiji buyampe bwitukwashanga twikale bantu batame ne bambutwile babwanya kuvuija biselwa byabo. Inoko ketubwanyapo kukulupila’mba tukekala na byonso byotusakilwa ne na nsangaji, pa mwanda wa masomo mayampe a ntanda onkaonka otufundile. Shi tusaka bintu byonso byotulonga mu būmi byendeke, tufwaninwe kufundijibwa na Leza. Bisonekwa binena’mba muntu uteja Leza, “bintu byonso byalonga bikendeka.”​—Ñimbo ya Mitōto 1:1-3.