Lelo Lupeto Ye Kitako kya Bubi Bonso?

Bilondolola Bible

Aa, Bible kanenapo amba lupeto i lubi, kadi katelapo lupeto bu kintu kine kilengejanga bintu byonso bibi. Muneneno unenanga bantu bavule amba, “lupeto i kitako kya bubi bonso,” i muneneno mupatuke wa mu Bible kadi ulubija bantu. Aye Bible unena’mba “kusanswa kwa lupeto kyo kitako kya bubi bonso.”a—1 Temote 6:10, Mukanda Ukola.

Le Bible unena bika pa lupeto?

Bible witabija’mba shi lupeto lwingidijibwa senene, lubwanya kukwasha, enka ne ‘kukinga.’ (Musapudi 7:12) Kadi, Bible ufwija’ko boba balombola bakwabo buntu, kimfwa padi na kwibapa byabuntu bya lupeto.—Nkindi 11:25.

Inoko kadi Bible witudyumuna tuleke kuta mutyima bininge mu būmi ku lupeto. Unena’amba: “Mwikadilo wa būmi bwenu wikale wa kubulwa kusanswa lupeto, koku musangela bintu bidi’ko pano.” (Bahebelu 13:5) Ñeni yotuboila’ko i ya kwingidija lupeto biyampe ne kuleka kukimbakimba bupeta. Inoko tufwaninwe kusangela bintu bine byotusakilwa, kimfwa byakudya, bisandi, ne mwa kwikala.—1 Temote 6:8.

**Mwanda waka Bible udyumuna bantu baleke kusanswa lupeto?**

Bantu ba makomwa-meso kebakamonepo būmi bwa nyeke. (Bene Efisesa 5:5) Bubinga bumo bidi i mwanda makomwa-meso i kutōta bilezaleza, nansha butōtyi bwa bubela. (Bene Kolose 3:5) Bubinga bukwabo i mwanda divule dine muntu wa makomwa-meso kalondangapo misoñanya miyampe. Kisonekwa kya Nkindi 28:20 kinena’mba boba ‘bapēlakana kukimba bupeta kebakekalapo bampikwa mambo.’ Babwanya’nka ne kukimba kulonga bintu bibibibi, kimfwa manyengenyenge, budimbidimbi, bwivi, butumbula, nansha kwipayañana.

Nansha shi kusanswa lupeto kekutwalangapo nyeke ku mwiendelejo mubi, ino kubwanya kulupuka bipa bibi bikwabo. Bible unena’mba “boba basumininwe kwikala bampeta baponenanga mu matompo ne mu dikinga ne mu bya kusakasaka bivule bya bulembakane kadi bisanshija.”—1 Temote 6:9.

Le madingi aleta Bible pa lupeto abwanya kwitukwasha namani?

Muntu ukimba kusokola lupeto luvule pampikwa kujilula misoñanya ya mu mwikadilo ne ya ku mushipiditu, bantu bakamulēmeka kadi Leza ukamwitabija ne kumukwatakanya. Leza i mulaye boba bakimba kumusangaja’mba, “nkikakushiyepo nansha dimo kadi nkikakwelapo nansha dimo.” (Bahebelu 13:5, 6) Kadi witukulupija’mba “muntu mukōkele ukamona madyese mangi.”—Nkindi 28:20.

Bisonekwa bīsambila pa lupeto

Musapudi 7:12: ‘Lupeto lukiñanga.’

Mokishintulwila: Shi lupeto lwingidijibwa na tunangu, lubwanya kwikala na kamweno mwanda luletanga mutyima-ntenke mu muswelo kampanda.

Luka 12:15: “Nansha shi muntu udi na bintu bingi, būmi bwandi kebutambangapo ku bintu byadi nabyo.”

Mokishintulwila: Lupeto kekintupo kya mvubu kutabuka mu būmi, kadi keluketuletelapo būmi bwa nyeke.

1 Temote 6:10: “Kusanswa lupeto i kitako kya bintu bibibibi bya miswelo yonso, kadi pa kwipāna’mo bamo ke basāsukile kulampe na lwitabijo kadi ke betapetape na misanshi mivule mine.”

Mokishintulwila: Lupeto ke lubipo. Inoko bantu basenswe lupeto, belutele mutyima bininge mu būmi bwabo, beletelanga makambakano, kimfwa kupomoka kwa bisaka ne kubela pa mwanda wa kwingila bininge.

Bahebelu 13:5: “Mwikadilo wa būmi bwenu wikale wa kubulwa kusanswa lupeto, koku musangela bintu bidi’ko pano”

Mokishintulwila: Pa kyaba kya kwipeneneka mu kukimbakimba bupeta, i biyampe tusangēle byobya bine byotusakilwa.

Mateo 19:24: “I kipēla’ko ngamedia kupita mu keso ka lushinge kutabuka’ko mpeta kutwela mu Bulopwe bwa Leza.”

Mokishintulwila: Yesu wādi’tu wita nsongwalume mpeta amulonde. Uno muntu wāpela mwanda wādi ulamete bininge ku bintu byandi. Ebiya Yesu wāleta kidyumu. Muntu utangidija bupeta kumeso kupita’ko Leza ubwanya kubulwa būmi bwa nyeke.

a Uno vese i mwalamunwe ne amba: “Kusanswa lupeto i kitako kya bintu bibibibi bya miswelo yonso.”