Mwanda Waka Tususuka, Tununupa, ne Kufwa?

Tususukanga Mwanda wa Bambutwile Betu Babajinji

“Monka mwātwelele bubi mu ino ntanda kupityila ku muntu umo ne lufu kupityila ku bubi, mo mwasambakenine ne lufu ku bantu bonso.”​—BENE LOMA 5:12.

Leza wāpangile bambutwile betu babajinji, ba Adama ne Eva na ñeni ne imbidi mibwaninine. Wēbatūdile mu kifuko kiyampe pano pa ntanda kyādi kitwa bu budimi bwa Edena. Wēbalombola’mba babwanya kudya ku mityi yonso ya mu budimi kutalula’mo’tu enka mutyi umo kete. Ino ba Adama ne Eva bādya ku kipa kya ku uno mutyi, bālonga bubi. (Ngalwilo 2:15-17; 3:1-19) Bano ba mulume ne mukaji pa kupela kukōkela Leza, nandi wēbapanga mu budimi, kupwa būmi bwebakomena. Mwenda mafuku babutula bana, kadi nabo būmi bwebakomena. Bonso bānunupa kupwa bāfwa. (Ngalwilo 3:23; 5:5) Netu tubelanga, tununupa ne kufwa, mwanda twi batambe kudi ba Adama ne Eva.

Bamwikeulu Babi Betubwejanga’ko Masusu

“Ino ntanda yonsololo idi mu lupusa lwa yewa mubi.”​—1 YOANO 5:19.

Uno “mubi” i Satana. I mwikeulu wampikwa kumweka wātombokēle Leza. (Yoano 8:44; Kusokwelwa 12:9) Mwenda mafuku bamwikeulu bakwabo nabo bēlungile kudi Satana. Betwanga bu bandemona. Bano bamwikeulu babi bengidijanga bukomo bwabo mwanda wa kongola bantu ne kwibapalula kudi Umpangi. Baloñanga bukomo bwa kulengeja bantu bavule balonge bintu bibi. (Ñimbo ya Mitōto 106:35-38; 1 Temote 4:1) Satana ne bandemona basenswe kusanshija bantu ne kwibasusula.

Kyaba Kimo Twiletelanga Masusu Batwe Bene

“Kyokya kikuna muntu shi kika shi kika, e kyonka kyakangula.”​—BENE NGALATEA 6:7.

Divule dine batwe bonso tususukanga pa mwanda wa bubi botupyene, ne pa mwanda wa ntanda ya Satana yotushikete’mo. Inoko kyaba kimo bantu beletelanga masusu abo bene. Namani? Pobalonga bintu bibi nansha pobakwata butyibi bubi kulupukanga bintu bibi. Inoko shi bantu balonga bintu biyampe, kulupukanga bintu biyampe. Kimfwa, mulume kadi shabana wampikwa budimbidimbi wingila bininge kadi usenswe kyandi kisaka, ukamona bintu biyampe bivule ne kulengeja kyandi kisaka kikale na nsangaji. Inoko yewa ukaya makayo a kwidya lupeto, utoma mālwa bininge nansha kaso kwingila ukekala mulanda pamo ne kyandi kisaka. Nanshi i biyampe tuteje Umpangi wetu. Usakanga tumone bintu biyampe bivule ne “ndoe mivulevule.”​—Ñimbo ya Mitōto 119:165.

Tususukanga Mwanda Tudi mu “Mafuku a Mfulo”

“Mu mafuku a mfulo . . . , bantu bakekala ba kwisanswa abo bene, ba kusanswa lupeto, . . . bampikwa kukōkela bambutwile, . . . ba kubulwa kwīfula, ba bukalabale bwa malwa, bampikwa kusanswa buyampe.”​—2 TEMOTE 3:1-5.

Dyalelo bantu bavule beendejanga monka munenena’kyo kino kisonekwa. Mwiendelejo wabo i bubinga bukwabo bulombola’mba tudi mu “mafuku a mfulo” ya ino ntanda. Kadi Bisonekwa byālaile amba mu kino kyetu kitatyi kukekala mavita, bipupo bya nzala, kutenkana kukatampe kwa ntanda, ne misongo. (Mateo 24:3, 7, 8; Luka 21:10, 11) Bino bintu biletanga masusu mavule ne lufu.