Mwanda Waka Bantu Bavule Kebakilēmekangapo ba mu Kisaka?

**MWANDA WAKA KWILĒMEKA MU KISAKA I KWAMVUBU?**

Kwilēmeka mu kisaka kulengejanga mulume, mukaji ne bana bekale mu ndoe.

Dibuku Misoñanya Isamba-Ibidi ya Kukwasha Bisaka Bikale Biyampe dinena’mba ba mulume ne mukaji balombolanga’mba i belēmeke na kwilongela tubilongwa twa buswe “mu myanda mikatampe ne mu tumyanda tutyetutye twa mu būmi bwa difuku ne difuku.”
Bukimbi bulombola’mba bana bafundijibwe kwikala na bulēme kebetyepelwangapo, bapwananga bininge na babo bambutwile, kadi kebavudilepo kubela misongo ya mu ñeni.

BYA KULONGA PA KULOMBOLA’MBA ULĒMEKELE BA MU KISAKA

Wisambile’po na ba mu kyobe kisaka. Dibajinji, abe ne obe mukaji mufwaninwe kuyuka mu ñeni bintu biloñwanga bilombola “bulēme.” Dya bubidi, lembai pa papye ngikadila ilombola bulēme yomusaka kumona mu benu bana, kadi lembai ne ngikadila yomusaka bashinte. Dya busatu, mwisambilei’po na bana mwanda wa muntu ne muntu ayuke bya kulonga mu kisaka pa kusaka’mba mwikale bulēme.

“Mpango ikankalwanga shi kekudipo kwisambila pamo, ino pa badingidi bavule kudi kufikidila.” —Nkindi 15:22.

Shila ba mu kyobe kisaka kimfwa. Langulukila pa byoloñanga. Le uvudile kutopekatopeka ba mu kyobe kisaka pa mwanda wa bilubo byabo, kwibazawila shi baleta mulangwe, nansha kwibasūla ne kwibaketa kishima pobesamba nobe? Vuluka’mba abewa ye ufwaninwe kwikala mubajinji mu kulēmeka bantu mu kisaka.

Madingi: Wimone bu ufwaninwe kulēmeka bininge obe mukaji ne bobe bana. Kokalanga nansha dimo amba kudi bidi kintu kyobafwaninwe kulonga pa kusaka’mba wibalēmeke.

“Mu kwilēmeka banwe bene na bene namo, ikalai babajinji.”—Bene Loma 12:10.

Kokaleka kulēmeka muntu nansha umo mu kisaka shi baleta mulangwe mwishile na owadi usaka. Shi kowisambe kokikala na kibidiji kya kunena’mba, “Abe’nka nankyo” nansha’mba, “Abe kyo kyobe kisela.” Mwanda binenwa bya uno muswelo bisa kusanshija muntu wa mu kyobe kisaka, kadi kebyo kuleta mfika mwinjibo.

“Kulondolola na kitūkijetyima kusonsololanga bukalabale, ino binenwa bisansa bikolomonanga bulobo.”—Nkindi 15:1.

Nkasampe mwana-mukaji ulonda video pa jw.org.

BILOÑANGA BATUMONI BA YEHOVA PA KUKWASHA BANTU BELĒMEKE MU KISAKA

Batwe Batumoni ba Yehova tukankamikanga bantu belēmeke mu bisaka, o mwanda twisambilanga divule pa uno mwanda mu mavideo, mu bishinte, pa site yetu ya Entelenete, mu mapepala, mu mabuku, ne mu maboloshile. Kadi tupanga’byo bantu ku bitupu, bikale bitampe nansha bya mu bingidilwa bya busendwe.

MOTUKWASHISHANGA BA MULUME NE MUKAJI: Bishinte Bukwashi ku Bisaka bibwanya kukwasha mulume nansha mukaji ayuke . . .

mwa kwivwanina mwinē pandi
bya kulonga pa kuleka kwijila mwinjibo
mwa kulekela kwibingija mwinjibo kyaba ne kyaba

(Enda pa jw.org ulembe pa kukimbila amba, “Busongi ne Kisaka” kupwa wende pa kipindi “Kwisamba”)

MOTUKWASHISHANGA BAMBUTWILE: Bishinte Bukwashi ku Bisaka bibwanya kukwasha bambutwile bafundije babo bana . . .

mwa kwikadila na kikōkeji
twaji twa kwinjibo
bekale na kibidiji kya kunena’mba, “Mfwile’ko lusa” ne amba, “Wafwa’ko”

(Enda pa jw.org ulembe pa kukimbila amba, “Kulela Bana” ne “Kulela Bankasampe”)

Tala ne bishinte “Bintu Bisamba bya Kwifunda Bana” mu Langukai! No. 2 2019 ne “Bintu 12 Bileta Nsangaji mu Kisaka” mu Langukai! No. 2 2018 p. 8-19, kimba bino bishinte pa jw.org.

MOTUKWASHISHANGA BANKASAMPE: Mu kipindi Bankasampe ne Bansongwa kidi pa jw.org mudi bishinte, mavideo, ne madevwala abwanya kukwasha bankasampe bayuke . . .

bya kulonga pa kwiteleka na bambutwile ne pa kwikala mu ndoe na banababo ba mu ndá
mwa kwisambila na bambutwile na bulēme pa bijila byobebatūdila
bya kulonga pa kukulupilwa na bambutwile

(Enda pa jw.org ulembe pa kukimbila amba, “Bankasampe ne Bansongwa”)

Kutwela pa jw.org i ku bitupu. I kutupu lupeto lobasa kukulomba’po, nansha kaluñengele ka abe kutoneka mwanda wa kwilembeja, i kutupu kisumpi kampanda mobasa kukulomba utwele, kadi i kutupu myanda ikutala’nka abe mwine ibwanya kukulombwa.