Bupangi Kutūla ku Dilobe

Diulu ne ntanda byātambile kwepi? Lelo dyuba, kweji ne ñenyenye, pamo ne bintu bikwabo bivule bidi pano pa ntanda, byāikele’ko muswelo’ka? Bible uleta malondololo a bine panena’mba byāpangilwe na Leza. O mwanda dino dibuku dyetu dishilula na mānga ya bupangi.

Tukamona’mba bipangwa bibajinji byāpangilwe na Leza i bantu ba ku mushipiditu bamwifwene. Bano bantu i bamwikeulu. Ino, ntanda yāpangīlwe batwe bantu. Leza wābumbile mwana-mulume ne mwana-mukaji, majina abo i ba Adama ne Eva, kupwa wēbatūla mu budimi bulumbuluke. Ino bāpela kukōkela Leza, penepo bājimija dyese dya kwikala nyeke na būmi.

Tamba kitatyi kyāpangilwe Adama kutūla ne ku Dilobe dikatampe, pāpityile myaka 1 656. Umbula bwa kino kitatyi, kwādi bantu babi bavule. Mu madiulu mwādi bantu babi ba ku mushipiditu, boketukokejapo kumona na meso, i Satana ne bademona bandi. Pano pa ntanda napo, pādi Kena ne bantu bakwabo babi, kubadila’mo ne batumpangala. Inoko kwādi kadi ne bantu bayampe pano pa ntanda—Abele, Enoke ne Noa. Mu KIPINDI 1 tukatanga’mo myanda ya bano bantu bonso ne myanda mikatampe yālongekele.