Muntu Mukankamane

BUVULE bwa bantu byobwādi bwenda bwilundila’ko pano pa ntanda, bavule bādi balonga bintu bibi pamo’nka bwa Kena. Ino kwādi muntu umo wādi mwishile na bakwabo. Uno muntu wādi utelwa bu Enoke. Enoke wādi muntu mukankamane. Bantu bonso bādi balonga bintu bibi, ino Enoke wāendelele na kwingidila Leza.

Lelo uyukile mwanda waka bano bantu bālongele bintu bibi? Vuluka, i ani wātonwene ba Adama ne Eva baleke kukōkela Leza ne badye ku kipa kyēbapeleje Leza kudya’ko? Eyo, wādi mwikeulu umbi. Bible umutelanga bu Satana. Satana uloñanga bukomo bwa kusaka bantu bonso bekale babi.

Difuku dimo Yehova Leza wānene Enoke asapwile bantu mwanda obādi bapela kwivwana. Mwanda mwine i uno amba: ‘Difuku dimo Leza ukepayanga bantu bonso babi.’ Kimweka bu bantu bākalabele pa kwivwana uno mwanda. Padi bātompele ne kwipaya Enoke. Nanshi Enoke wādi ufwaninwe kwikala mukankamane pa kusapwila bantu kyādi kisaka kulonga Leza.

Leza kālekelepo Enoke kwikala na būmi mu bula bwa myaka mivule. Enoke wālele enka myaka 365 kete. Mwanda waka tunena’mba “enka myaka 365”? Mwanda mu kine kitatyi’kya bantu bādi na bukomo mpata kupita ba dyalelo, kadi bādi balāla myaka mivule. O mwanda mwanā Enoke, Metuzala wālele myaka 969!

Pāfwile Enoke, bantu bāikele babi kupita. Bible unena’mba ‘mifwatakanyo yabo yonso yādi enka imbi,’ ne kadi’mba ‘ntanda yāyudile bukalabale.’

Lelo uyukile mwanda waka kwādi kavutakanya kakatampe pano pa ntanda mu mene mafuku’a? Mwanda Satana wāingidije miswelo mikwabo ya kutonona bantu balonge bubi. Tukabandaula’yo mu mānga ilonda’ko.