Mwanda Waka Bājimije Kīkalo Kyabo

TALA mobyaikadila pano. Ba Adama ne Eva abapangilwa panja pa budimi bulumbuluke bwa Edena. Lelo uyukile i mwanda waka?

Mwanda abalonga kintu kibi kutabuka. O mwanda Yehova webape mfuto. Lelo uyukile kintu kibi kyālongele ba Adama ne Eva?

Bālongele kintu kyebāpeleje Leza kulonga. Leza wēbasapwidile’mba bādi bafwaninwe kudya bipa bya ku mityi ya umbudimi. Ino Leza wēbakankaja kudya ku mutyi umo amba, shi badye’ko bakafwa. Wāshile uno mutyi bu wandi aye mwine. Ne tuyukile’mba ke kiyampepo kuyata kintu kya bene, mwene i amo? Eyo, i kika kyālongekele?

Difuku dimo pādi Eva kasuku kandi mu budimi, nyoka wēsamba nandi. Langa’po bidi! Nyoka wāsapwila Eva adye kipa kya ku mutyi wēbapeleje Leza’mba kemukidya’ko. Inoko, Yehova paāpangile banyoka, kēbapelepo bukomo bwa kwisamba. O mwanda nanshi kudi muntu kampanda wāneneje uno nyoka. Lelo wādi ani?

Kādipo Adama. Nanshi wādi ufwaninwe kwikala umo wa mu bantu bāpangilwe na Yehova kumeso kwa kupanga ntanda. Bano bantu i bamwikeulu, ne ketukokejapo kwibamona. Uno mwikeulu wāikele na kibengo. Wāshilula kulanga kwikala muludiki mwikadile Leza. Ne wādi usaka bantu bamukōkele aye pa kyaba kya kukōkela Yehova. Bine, uno ye mwikeulu wāneneje nyoka.

Uno mwikeulu wābwenye kongola Eva. Eva wāitabije pāmusapwidile mwikeulu amba ukekala pamo’nka bwa Leza shi adye ku kipa. Penepo wādya, ne Adama nandi wādya. Ba Adama ne Eva kebākōkelepo Leza, o mwanda bājimije budimi, kīkalo kyabo kilumbuluke.

Ino difuku dimo, Leza ukālamunanga ntanda yonso ke miyampe monka, enka na mwādi mwikadile budimi bwa Edena. Kumeso’ku, tusa kumona muswelo okokeja nobe kukaputumina mu uno mwingilo wa kuneñenya ntanda. Ino pano, tutalei kyāfikile ba Adama ne Eva.