FUNDIJAI BENU BANA
Leza Ubwanya Kufītwa—Muswelo Otukokeja Kumusangaja
Lelo kashā kodi mufītwe bininge wadila’nka ne kudila?—a Padi batwe bonso kebitufikile. Inoko, kyaba kimo tubwanya kudila mwanda wa kwivwana bulanda. Muntu ubwanya padi kwitunenena bintu bibi bya bubela. Mwene kino kibwanya kwitufītyija ku mutyima?— Leza nandi ubwanya kufītwa kitatyi kyobamubepela mabela. Twisambilei bidi pa uno mwanda ne kumona muswelo otubwanya kusangaja Leza kupita’ko kumusanshija.
Bible unena amba, bantu bamo bānene amba baswele Leza ‘bāmufītyije ku mutyima.’ Bine, ‘bāsombele’ Leza! Na bubine, i kutupu muntu nansha umo, ubwanya kusanshija Yehova Leza ku ngitu. Aye i mwine bukomo bonso. Shi ke pano, tutalei kine kifityilwanga Yehova ku mutyima shi ketulongapo byaetunena kulonga.
Bantu babidi babajinji bāpangilwe na Yehova pano pa ntanda bāmusanshije bininge ku mutyima. Bano bantu babidi bātūdilwe mu Paladisa pano pa ntanda yāityilwe bu “budimi bwa Edena.” Le bano bantu babidi bādi bāni?— Bine, wādi Adama kupwa mwenda mafuku ke Eva. Tutalei byobālongele byāsanshije Yehova ku mutyima.
Yehova pa kupwa kwibatūla mu buno budimi, wēbalombwele kwibulama. Kadi wēbalombwele’mba bādi ba kubutula bana ne kushikata abo bonso pamo mu buno budimi pakubulwa kufwa. Ino, kumeso’tu kwa ba Adama ne Eva kubutula, kwālongeka kintu kibi. Le uyukile kyādi kintu’ka?— Mwikeulu umo wātonwene Eva ne Adama batombokele Yehova. Tutalei mobyāpityile.
Mwikeulu wālengeje nyoka, amweke unena. Eva wāloelelwa byaādi wivwana nyoka umunena’mba, ukekala pamo “bwa Leza.” Penepa nandi wālonga byobya byāmulombwele nyoka. Lelo uyukile byaālongele byādi bika?—
Eva wādile ku mutyi obāpeleje Adama kudya’ko kudi Yehova. Kumeso kwa Leza kupanga Eva, wālombwele Adama amba: “Ku mityi yonso ya budimi kudya udyako bitupu kekudipo mwanda. Nanshi ku mutyi wakuyukanya buya ne bubi, kokadyako i kijila; mwanda difuku dyokadyako mwiko, kufwa ukafwanga.”
Eva wādi uyukile kino kijila. Ino, wādi’nka utala ku uno mutyi, kadi wēumwene’mba “wadi mulumbuluke kudyako, kabidi wadi wa buya bwa dyangi kutalako . . . waapako bipa byao ne kudya wadya.” Kupwa wapa Adama kipa, nandi “wadya.” Molangila, mwanda waka wālongele kino?— Mwanda Adama wāsenswe Eva bininge kupita’ko kuswa Yehova. Wātongele kumusangaja pa kyaba kya kusangaja Leza. Ino kukōkela Yehova kudi na mvubu mpata kupita’ko kukōkela muntu ye-yense!
Lelo ukivulukile nyoka wēsambile na Eva? Monka mubwaninya muntu kulengeja kipopi kimweke kisamba, muntu kampanda wālengeje nyoka amweke unena. Le diwi dyādi dinenena mudi nyoka dyādi dya ani?— Dyādi diwi dya “nyoka wa kala na kalā, wakutelwa dya bu-Dyabola ne dya bu-Satana.”
Le uyukile muswelo obwanya kusangaja Yehova?— Ubwanya kumusangaja na kulonga nyeke bukomo bwa kumukōkela. Satana unenanga’mba ubwanya kunekenya bantu bonso balonge byaebasakila kulonga. O mwanda Yehova witusoñanya amba: “Wami mwana, wikale wañeni ne kusangaja mutyima wami, amba nondolole yewa umpunika.” Satana upunikanga, nansha kubenga Yehova. Unenanga’mba ubwanya kubombola bantu bonso baleke Kumwingidila. Nanshi sangaja Yehova na kumukōkela ne kumwingidila! Lelo ukalonga bukomo bwa kulonga kino?—
Tanga mu obe Bible
Ngalwilo 1:26-28; 2:15-17; 3:1-6
[Kunshi kwa dyani]
a Shi utanga na mwana, kashiko kakuvuluja pa kwimana, kadi kankamika mwana esambe aye mwine.
[Kifwatulo pa paje 14]
[Kifwatulo pa paje 15]