Bantu Abaūbaka Kiteba Kikatakata

MYAKA mivule yāpityile’po. Bana ba Noa bādi kebadi na bana bavule. Babo bana nabo bātama, bābutula bana bavule. Pano ne pano ntanda yāikalwa na bantu bangibangi kashā.

Mu bano bantu, mwādi ne Nimiloda, nkanununa wa Noa. Wādi nkuma-bibi wādi upoya ne kwipaya banyema ne bantu bene. Kadi Nimiloda wēbikikile aye mwine bu mulopwe mwanda wa kutādila bantu bakwabo. Leza kāloelelwepo Nimiloda.

Mu kine kitatyi’kya, bantu bonso bādi besamba enka ludimi lumo. Nimiloda wādi usaka kwibakongela pa kyaba kimo mwanda wa ebaludike. Shi ke pano, lelo uyukile kyaālongele? Wāsapwidile bantu bōbake kibundi ne kiteba monka. Wibatale pa kifwatulo, aba kebo bafwatula matafwadi.

Yehova Leza kāsangedilepo luno lūbako. Leza wādi usaka bantu bekale pano pa ntanda ponso. Inoko bantu bānena’mba: ‘Twayai twishimikile kibundi ne kiteba kilakila, mutwe wakyo utenge ne mu madiulu mwine. Nabya tusa kutumba!’ Bantu bādi basaka kwitumbija abo bene, bapela kutumbija Leza.

Enka nenki, Leza wāimika mwingilo wabo wa lūbako lwa kiteba. Lelo uyukile mwawāimikile’o? I na kutonona bantu besambe mu kitulumukila ndimi mishileshile, kyaba kya kwisamba enka ludimi lumo. Bōbaki kebādipo kadi beumvwana abo bene na bene. O mwanda kyabo kibundi kyāinikilwe bu Babele, nansha Babiloni, kushintulula ko kunena’mba “Kavutakanya.”

Ponka’po, bantu bāshilula kwenda kulampe na Babele. Kibumbo kya bantu besamba ludimi lumo baenda kukashikatyila pamo pa kifuko kikwabo kya ntanda.