Kiteba kya Babele

Pa kupwa kwa Dilobe, bana ba Noa ne babo bakaji bābutwile bana bavule. Bisaka byabo byābaya, ne kuzambalala mu bipindi bishileshile bya ntanda, monka mwēbasoñaninye’kyo Yehova.

Inoko bantu ba mu bisaka bimo kebākōkelepo Yehova. Bānenene’mba: ‘Tūbakei kibundi twikale pano. Tusa kūbaka kiteba kilampe bininge, nsongo yakyo ikafika ne mūlu. Nabya tukatumba.’

Yehova kāsangedilepo byālongele bano bantu, o mwanda wēbakalakenye. Le uyukile muswelo wāebakalakenye? Wēbalengeje mu kitulumukila besambe ndimi mishileshile. Byokēbakidipo beivwana byobanena, bālekele kūbaka’kyo. Kino kibundi kyobādi bobaka kyāityilwe bu Babele, kishintulula’mba “Kavutakanya.” Bantu bāshilula kuvilukila ku bifuko bikwabo. Inoko bāendelele’nka na kulonga bintu bibi ne kobāvilukidile’kwa. Le kudi bantu bādi bakisenswe Yehova? Tusa kwibayuka mu kifundwa kilonda’ko.