Mukaja Lota Watale Kunyuma

LOTA ne kisaka kyandi bādi bashikete pamo na Abalahama mu ntanda ya Kenani. Difuku dimo Abalahama wāsapwila Lota’mba: ‘Pano ntanda keikitubwenepo kushikata na banyema betu bonso. Nakwisāshila, twisansanye abe ne ami. Shi wenda ku lunkuso nankyo ku lundyo ko kwami, shi wenda ku lundyo nankyo ku lunkuso ko kwami.’

Lota wātulula meso katale ntanda. Wāmona kipindi kimo kya ntanda kiyampe’tu kyādi na mema ne biyombo bingi bya dyangi bya banyema bandi. Ino yādi ntanda ya Yodano. Lota wāvilukila’ko aye ne kisaka kyandi ne banyema bandi. Bāfika ne kushikata bāshikata mu kibundi kya Sodoma.

Bantu ba mu Sodoma bādi babi bininge. Uno mwanda wāfityije Lota mutyima, mwanda wādi muntu muyampe. Leza nandi wāfityilwe. Kupwa, Leza wātuma bamwikeulu babidi bakadyumune Lota’mba Leza usa konakanya Sodoma ne Ngomola kibundi kya pabwipi, mwanda i bibundi bibi.

Bamwikeulu bāsapwila Lota’mba: ‘Longa bukidi, sela obe mukaji ne bana bobe babidi bana-bakaji, mutaluke muno!’ Lota ne kisaka kyandi bādi baleñanya, ponka’po bamwikeulu bēbakwata ku makasa ne kwibalupwila panja pa kibundi. Penepo mwikeulu umo wānena’mba: ‘Mwipandijei būmi, kemukitala kunyuma nansha kwimana mu dilungu, nyemenai ku lūlu, kutyina’mba mwakalotejibwa.’

Lota ne bandi bana bana-bakaji bākōkele, bānyemena kulampe na Sodoma. Kēbaimenepo nansha kutala kunyuma kwine. Inoko mukaja Lota kākōkelepo. Pa kupwa kwenda kyaba kampanda kutamba ku Sodoma, mukaja Lota wāimene, wātala kunyuma. Ponka’po wāalamuka ke kyulu kya mwepo. Lelo umumwene pa kino kifwatulo?

Tukokeja kuboila’po bufundiji bulumbuluke. Kitulombola’mba Leza upandijanga boba bamukōkele, inoko boba bakubulwa kumukōkela bakajimija būmi bwabo.