Vulukai Mukaja Lota

Lota wādi ushikata na Abalahama, mwanabo na shandi mu ntanda ya Kenani. Mwenda mafuku, banyema ba Abalahama ne ba Lota bāvula bininge ntanda yēbatyepela. Abalahama wāsapwila Lota amba: ‘Kebikibwanikapo batwe bonso kushikata pamo. Nakwisāshila, tonga mutamba osaka kwenda, nami nkenda ku mutamba mukwabo.’ Bine, Abalahama kādipo wisakila, mwene?

Lota wāmona kipindi kilumbuluke kya ntanda kubwipi na kibundi kya Sodoma. Kwādi mema mavule ne biyombo bivule bivwambile. Ebiya wātonga kino kifuko ne kuvilukila’ko na kisaka kyandi.

Bantu ba mu Sodoma ne Ngomola, kibundi kyādi kubwipi bādi babi bininge. Byobādi babi bininge, Yehova wātongele konakanya bino bibundi. Inoko Leza wātongele kupandija Lota ne kisaka kyandi, o mwanda wēbatumīne bamwikeulu bakebadyumune amba: ‘Pejai! Tambai mu kino kibundi! Yehova usa kwikyonakanya.’

Lota kātambile’mopo bukidi. Wādi’nka ulejaleja. Penepo bamwikeulu bākwata Lota, wandi mukaji, ne babo bana babidi bana-bakaji ku makasa bēbatambija panja pa kibundi, ne kwibalombola’mba: ‘Nyemai! Nyemai mwanda wa kupandija bwenu būmi, kadi kemwakatalai kunyuma. Shi mutale kunyuma, musa kufwa!’

Abo pa kufika mu kibundi kitwa bu Zoale, Yehova wānokeja mudilo ne bibidikityi pa Sodoma ne Ngomola. Bino bibundi bibidi byāonakanibwe byonso fututu. Mukaja Lota kākōkelepo Yehova wātala kunyuma, wāalamuka ke kyulu kya mwepo! Inoko Lota ne bandi bana babidi bana-bakaji bāpandile mwanda bākōkele Yehova. Ye bano bāivwene bulanda bininge pāpelele kukōkela mukaja Lota. Inoko kadi bāsangele mwanda bātejeje byēbalombwele Yehova.