Isake Wasonge Mukaji Muyampe

LELO uyukile uno mwana-mukaji udi pa kino kifwatulo? Dijina dyandi i Lebeka. Ne mwana-mulume obakesambakana nandi i Isake. Usa kwikala mukajandi. Byāikele muswelo’ka?

Byāikele namino, Abalahama, shandya Isake, wādi usaka kumusongela mukaji muyampe. Kādipo usaka Isake asonge mukaji Mwine Kenani, mwanda bano bantu bādi batōta baleza ba bubela. Enka nenki Abalahama wāita umpika wandi, kāmunena’mba: ‘Enda ku Halana, ntanda ya babutule bami, ukasongele wami mwana Isake mukaji.’

Ponka’po, umpika wa Abalahama wāyata bangamedia dikumi ne kukuta lwendo kaenda, lwādi lwendo lulampe. Wāfika kubwipi na kushikatanga babutule ba Abalahama, wāimana pa mushimwa wa mema. Kwādi ke ku kyolwa, pa kitatyi pailanga bana-bakaji ba mu kibundi kuteka mema ku mushimwa. Penepo umpika wa Abalahama wālombela kudi Leza amba: ‘Mwana-mukaji ukateka mema ne kumpa ami ne bangamedia, nankyo ye aye owatonga kwikala mukaja Isake.’

Pano ne pano Lebeka waiya kuteka mema. Uno umpika wāmulomba mema a kutoma, Lebeka wāmupa. Kupwa wāenda kukateka mema mavule a bangamedia bādi na kyumwa. Uno wādi mwingilo mukomo, mwanda bangamedia batomanga mema mavule.

Lebeka pa kupwa kwingila uno mwingilo, umpika wa Abalahama wāmwipangula dijina dya shandi. Kadi wāmulomba shi ukokeja kulāla kwabo bobwa bufuku. Wālondolola’mba: ‘Tata i Betule, kadi kwetu kudi kyaba kya abe kwikala pamo netu.’ Umpika wa Abalahama wādi uyukile’mba Betule i mwanā Nahola, mwanabo na Abalahama. Ebiya, wāfukama manwi panshi ne kufwija’ko Yehova pa mwanda wa kumuludika kwaāmuludikile kudi banababo na Abalahama.

Bwine bufuku’bwa, umpika wa Abalahama wāsapwila Betule ne Lebane, tutu wa Lebeka, mwanda wāidile. Abo bonso babidi bāitabija’mba Lebeka ende nandi, akasongwe na Isake. Lebeka wālondolwele namani kitatyi kyobamwipangwile? Wāitabije kwenda, wānena’mba ‘Eyo.’ Ponka’po, difuku dilonda’po, bakanda pa bangamedia ne kukuta lwendo, kebajokela ku Kenani.

Bāfikile ke ku kyolwa. Lebeka wāmona mwana-mulume wādi wenda unanga mu budimi. Wādi Isake. Isake wāsangele pa kumona Lebeka. Inandi Sala wādi ke mufwe ke papite ne myaka isatu, ino aye wādi enka na bulanda. Inoko pano Isake pa kumona Lebeka, wāmusanswa bininge, wāikala monka na nsangaji.