Lwitabijo Lwandi Lubatompibwa

Abalahama wāfundije wandi mwana Izake kusanswa Yehova ne kukulupila milao ya Yehova yonso. Inoko Izake paābwenye myaka isenselela ku 25, Yehova wālombele Abalahama alonge kintu kimo kikomo bininge kulonga. Le i kintu’ka?

Leza wāsapwidile Abalahama amba: ‘Nakwisāshila, sela obe mwana umo kete ulambule’ye bu kitapwa pa lūlu lwa mu ntanda ya Modiya.’ Abalahama kādipo uyukile mwanda waka Yehova wāmulombele kulonga kino. Inoko wākōkele Yehova.

Abo bukya lubanga na futwi, Abalahama wāsela Izake ne bengidi bandi babidi kebenda ku Modiya. Pa kupwa kwenda lwendo lwa mafuku asatu, bāanza kumona ngulu dya kulampe. Abalahama wāsapwila bengidi bandi bebelaije, aye ne Izake bende bakalambule kitapwa. Abalahama wātwika Izake nkuni, Abalahama nandi wāsela lupete. Izake wāipangula shandi amba: ‘Le nyema otukalambula bu kitapwa udi kwepi?’ Abalahama wāmulondolola’mba: ‘Mwanami, Yehova mwine usa kuleta’ye.’

Abo pa kufika ku lūlu, bāubaka kisōkelo. Penepo Abalahama wākuta Izake makasa ne maulu wāmulādika pa kisōkelo.

Abalahama wātekuna lupete. Ponka na ponka, mwikeulu wa Yehova wāmwita aye papo mūlu amba: ‘Abalahama! Kokalonga mwana kibi! Pano nayuka’mba udi na lwitabijo mudi Leza, mwanda ubaitabija kulambula obe mwana.’ Kupwa Abalahama wāmona mukōko mulume mwikobeke masengo mu kivunda. Wākutulula Izake bukidibukidi ne kulambula mukōko’wa pa kyaba kya Izake.

Tamba dine difuku’dya, Yehova wāityile Abalahama bu mulunda nandi. Le uyukile i mwanda waka? I mwanda Abalahama wālongele byonso byādi bimusakila Yehova kulonga, nansha ke pakādipo wivwanije kine kisakila Yehova alonge’byo.

Yehova wāpitulukīle Abalahama mu byaāmulaile amba: ‘Nkakwesela, kadi nkavudija bobe bana, nansha lutundu.’ Kino kishintulula’mba Yehova wādi wa kwesela bantu bayampe bonso kupityila ku kisaka kya Abalahama.