Yehova Wāmwityile bu “Mulunda Nami”

1, 2. (a) Le tubayuka namani amba bantu babwanya kusamba bulunda na Leza? (b) Lelo i bika byotusa kubandaula mu kino kishinte?

TUSAKANGA betuswe tamba ku kubutulwa kwetu kufika ne ku lufu. Bantu basakanga kwifwena ne kwiswa bya bulunda, ino ke na buswepo’tu bwa kwikena. Inoko kintu kitabukile byonso i kino amba tusakilwa buswe butamba kudi Yehova. Bavule kebetabijangapo amba bantu babwanya kusamba bulunda bwa pabwipi na Leza ke-pantu i mwinē bukomo bonso kadi kamwekangapo. Inoko tuyukile bubine!

² Tutanga mu Bible amba kudi bantu bāikele balunda na Leza. Tufwaninwe kuboila ñeni ku bimfwa byabo. Mwanda waka? Mwanda bulunda na Leza i kitungo kya mvubu mpata kyotubwanya kwitungila mu būmi. Nanshi tubandaulei kimfwa kya Abalahama. (Tanga Yakoba 2:23.) Le i muswelo’ka waāikele mulunda na Leza? Bulunda bwa pabwipi bwāsambile Abalahama na Leza bwādi bwimanine pa lwitabijo ne kadi uyukene bu “shandya bonso badi na lwitabijo.” (Loma 4:11) Pano pobandaula kino kyandi kimfwa, wiipangule amba, ‘Le i muswelo’ka onkokeja kwiula lwitabijo lwa Abalahama ne kuningija bulunda bwami na Yehova?’

LELO ABALAHAMA WĀIKELE MULUNDA NA YEHOVA NAMANI?

3, 4. (a) Sekununa ditompo dikomo dyātene Abalahama mu lwitabijo. (b) Mwanda waka Abalahama wāsakile kwela Izake bu kitapwa?

³ Mumone Abalahama na myaka 125 ukanda bityebitye ku lūlu.^[1] (Tala bilembwa bya ku mfulo.) Wandi mwana Izake papo na myaka kintu kya 25 umulonda kunyuma. Izake uselele nkuni, Abalahama nandi uselele kipete ne bya kubanza nabyo mudilo. Luno lwendo lumweka bu lwādi lukomo mu ñendo yāendele Abalahama. Inoko ke pa mwandapo wa bununu. Wādi ukidi na bukomo buvule. Ino, luno lwendo lwādi lukomo mwanda Yehova wāmunene ele wandi mwana bu kitapwa!—Ngalwilo 22:1-8.

⁴ Bimweka bu dino dyādi ditompo dikomo mu lwitabijo lwa Abalahama. Bantu bamo banenanga’mba Leza i ntapani pa kunena Abalahama ele wandi mwana bu kitapwa. Kadi bakwabo nabo banenanga’mba Abalahama wāitabije na mutyima tō kulonga kino mwanda kādipo uswele wandi mwana. Bantu banenanga namino mwanda kebadipo na lwitabijo kadi kebayukilepo mwikadile lwitabijo lwa bine ne muswelo olwingila. (1 Kodinda 2:14-16) Ino Abalahama kākōkelepo Leza bupofu, ko kunena’mba kumukōkela pampikwa kulanga. Wākōkele mwanda wādi na lwitabijo lwa bine. Wādi uyukile amba Yehova kabwanyapo kumulomba alonge kintu kyo-kyonso kikamuletela kyaso kya nyeke. Abalahama wādi uyukile amba shi akōkele, Yehova ukamwesela aye ne mwanandi muswe mwine. Lelo i bika byādi bisakilwa Abalahama pa kwikala na lwitabijo lukomo uno muswelo? Wādi usakilwa buyuki ne kwimwena bintu.

5. Lelo Abalahama wāyukile Yehova namani, ne buno buyuki bwāmukweshe eivwane muswelo’ka?

⁵ Buyuki. Abalahama wātamine mu kibundi kya Ulu. Bantu ba mu kino kibundi bādi batōta bilezaleza, enka ne shandi mwine. (Yoshua 24:2) Penepa le Abalahama wāfundile kuyuka Yehova muswelo’ka? Bible ulombola amba Shema mwanā Noa wādi ubutulwa na Abalahama. Kadi wāikele’ko kufikija ne pābwenye Abalahama kintu kya myaka 150. Shema wādi mwana-mulume wa lwitabijo lukomo, kadi bimweka amba wāsapwidile banababo myanda ya Yehova. Ketuyukilepo bubine bonso, inoko padi i mu uno muswelo Abalahama mwaāyukile Yehova. Byobya byēfundile Abalahama byāmukweshe asanswe Yehova, kadi buno buyuki bwāmukweshe ekale na lwitabijo lukomo.

6, 7. Lelo bintu byēmwenine Abalahama byāningishe lwitabijo lwandi namani?

⁶ Myanda mimweke. Lelo myanda yēmwenine Abalahama yāningishe namani lwitabijo lwandi mudi Yehova? Bantu bamo banenanga amba milangwe itwalanga ku malango kadi malango nao atwala ku bilongwa. Mutyima wa Abalahama wātengelwe na byaāfundile padi Leza, kadi kino kyāmutonwene alēmeke bininge “Yehova Leza Mwine Mukatakata Mwine, mupangi mwine wa diulu ne ntanda mine.” (Ngalwilo 14:22) Bible utela buno bulēme bu ‘kwakamwa Leza.’ (Bahebelu 5:7) Tufwaninwe kwakamwa Leza pa kusamba nandi bulunda bwa pa mutyima. (Ñimbo 25:14) Ino yo ngikadilo yātonwene Abalahama akōkele Yehova.

⁷ Leza wālombwele ba Abalahama ne Sala bataluke mu kyabo kibundi kya Ulu, ne kuvilukila mu ntanda-bene. Bādi ke banunu, kadi bādi bakukashikata mu mapema mu būmi bwabo bonso. Nansha byādi biyukile Abalahama amba kubwanya kukekala byaka, ino wāsumininwe kukōkela Yehova. Leza wāmwesele ne kumulama pa mwanda wa kikōkeji kyandi. Kimfwa, pāselelwe Sala mukajandi mupopoke, Abalahama wādi mu kyaka kya lufu, ino Yehova wēbapandije misunsa mivule abo bonso bubidi mu kingelengele. (Ngalwilo 12:10-20; 20:2-7, 10-12, 17, 18) Bino bintu byēmwenine Abalahama byāningishe lwitabijo lwandi.

8. Le tubwanya namani kwikala na buyuki ne kwimwena bintu bine bikakomeja bulunda bwetu na Yehova?

⁸ Lelo tubwanya kwikala balunda ba pa mutyima ba Yehova? En-en, i amo! Pamo bwa Abalahama, tufwaninwe kuyuka Yehova. Kadi netu tubwanya kwikala na buyuki ne myanda mimweke yotusakilwa. Dyalelo tudi na bintu bivule kupita byādi na Abalahama. (Danyele 12:4; Loma 11:33) Mu Bible mudi buyuki buvule bwisambila padi Mwine “wapangile mūlu ne panshi.” Byobya byotwifunda bitutononanga tuswe Yehova ne kwitukwasha tumulēmeke bininge. Buno buswe ne bulēme botulēmekele Leza bwitutononanga tumukōkele. Potumukōkela, witulamanga ne kwitwesela, kadi kino kitulengejanga twimwene bintu bivule bikomeja lwitabijo lwetu. Kitatyi kyotwingidila Yehova ne pa mfulo, tukekala na maloa, ndoe ne nsangaji. (Ñimbo 34:8; Nkindi 10:22) Potwendelela kuvudija buyuki ne kwimwena bintu bivule, bulunda bwetu nandi nabo bukaningila’ko.

MUSWELO WĀLAMINE ABALAHAMA BULUNDA BWANDI NA LEZA

9, 10. (a) Lelo i bika bisakibwanga pa kusaka amba bulunda bunane? (b) Le i kika kilombola’mba Abalahama wādi usenswe bulunda bwandi na Yehova ne kwibukomeja?

⁹ Bulunda bwa bine bubwanya kwikala pamo bwa byabulēme bya mvubu mpata. (Tanga Nkindi 17:17.) Kebudipo bwa kintu kya lupoto lukande kingidijibwa’tu mwanda wa kunengeja mwinjibo. Ino budi pamo bwa diluba diyampe disakilwa kusangila mema ne kwidita mutyima mwanda wa divwambile senene. Abalahama wādi usenswe bulunda bwandi na Yehova ne kwibulama. Namani?

¹⁰ Abalahama wādi nyeke wakaminwe Leza bininge ne kumukōkela. Kimfwa, paēndele ku Kenani pamo ne kisaka ne bengidi bandi, wāendelele kuleka Yehova amuludike mu butyibi bwandi bukata ne butyetye bwine. Mwaka umo kumeso kwa Izake kubutulwa, papo Abalahama na myaka 99, Yehova wāmusoñenye atweje kwisao bana-bulume bonso ba mu kipango kyandi. Lelo Abalahama wātatene nansha kukimba kwikañanya na kuleka kulonga byāmusoñenye Yehova? Aa, wākulupile mudi Yehova ne kumukōkela “mu difuku dimo dyonka.”—Ngalwilo 17:10-14, 23.

11. Mwanda waka Abalahama wāzumbije mutyima pa mwanda wa Sodoma ne Ngomola, ne Yehova wāmukweshe namani?

¹¹ Abalahama byādi nyeke ukōkele Yehova nansha mu tubintu tutyetye, ye kyāningishe bulunda bwabo. Wādi uyukile amba ukokeja kulombola Yehova kanda konso enka ne kumulomba bukwashi kitatyi kyatanwa na myanda mikomo. Kimfwa, Yehova paāmulombwele amba usa konakanya kibundi kya Sodoma ne Ngomola, Abalahama wāzumbije mutyima pa uno mwanda. Mwanda waka? Mwanda wākwetwe moyo amba bantu bayampe basa kufwa pamo na babi. Wādi padi kalangalanga pa mwanda wa mwipwa wandi Lota ne kisaka kyandi bādi mu Sodoma. Abalahama wādi ukulupile mudi Yehova, “mutyibi mwine wa panopantanda,” o mwanda wālombwele Yehova milangwe yandi na kwityepeja. Yehova wādi utūkijije mulunda nandi mutyima ne kumulombola’mba i wa lusa. Yehova wāshintulwile’mba ukakimba bantu bayampe ne kwibapandija pakonakanya babi.—Ngalwilo 18:22-33.

12, 13. (a) Le buyuki ne bintu byēmwenine Abalahama byāmukweshe namani mwenda mafuku? (b) Lelo i bika bilombola amba Abalahama wādi ukulupile mudi Yehova?

¹² Buyuki ne myanda yēmwenine Abalahama byāmukweshe alame bulunda bwandi na Yehova. O mwanda, mwenda mafuku Yehova paānene Abalahama kulambula wandi mwana, Abalahama wāmwene amba Yehova i wa kitūkijetyima nyeke, wa lusa, ukulupilwa, kadi i mulami. Bine, Abalahama kāmwenepo Yehova bu ntapani nansha muntu wa mutyima mumu! Mwanda waka tubanena namino?

¹³ Mwanda Abalahama kumeso kwa kwishiya na bengidi bandi wēbanene amba: “Shalai kuno ne kimbulu, ino ami ne mwanuke twende kokwa, tūkatōtanga, ebiya tuketola kuno ko mudi.” (Ngalwilo 22:5) Le Abalahama wādi usaka kunena bika? Le wābepele pa kunena amba usa kwitola na Izake koku aye uyukile amba usa kumulambula bu kitapwa? Mhm. Bible unena amba Abalahama wādi uyukile’mba Yehova ubwanya kusangula Izake. (Tanga Bahebelu 11:19.) Abalahama wādi uyukile’mba Yehova ye wāmupele mwana nansha aye ne Sala byobādi ke banunu. (Bahebelu 11:11, 12, 18) O mwanda wājingulwile amba i kutupu kintu nansha kimo kibwanya kukomena Yehova. Abalahama kādipo uyukile byādi bya kulupuka’ko mu dine difuku’dya. Ino wādi na lwitabijo amba Yehova Leza ukasangula wandi mwana mwanda wa amba milao yandi yonso ifikidile. O mwanda Abalahama utelwanga bu “shandya bonso badi na lwitabijo.”

14. Lelo i makambakano’ka owikonda nao mu kwingidila Yehova, ne kimfwa kya Abalahama kibwanya kukukwasha namani?

¹⁴ Dyalelo, Yehova ketulombangapo twele betu bana bu bitapwa, ino witulombanga tukōkele ku mbila yandi. Kyaba kimo ketwivwanijangapo bubinga bwa ino mbila nansha padi tubwanya kwiimona bu mikomo kukōkela. Le nobe kodi mulange uno muswelo? Ku bamo mwingilo wa kusapula i mukomo. Padi bevwananga bumvu ne kumona bu bikomo kwisamba na bantu bokebayukilepo. Bakwabo nabo batyinanga kwishila na bakwabo ku kaji nansha ku masomo. (Divilu 23:2; 1 Tesalonika 2:2) Shi abakunena kulonga bintu bikomo, langulukila pa kimfwa kya kutendelwa kya Abalahama kya lwitabijo ne bukankamane bwandi. Potulangulukila pa bimfwa bya bana-balume ne bana-bakaji ba kikōkeji, kino kiketutonona twibeule ne kufwena bininge Yehova Mulunda netu.—Bahebelu 12:1, 2.

BULUNDA BULETA MADYESE

15. Mwanda waka tukulupile amba Abalahama kēalakenyepo nansha dimo pa kukōkela Yehova?

¹⁵ Lelo Abalahama wēalakenye pa kukōkela mbila ya Yehova? Bible unena amba Abalahama “wafwa mu bununu byamwiko, myaka mifikile’tu she.” (Ngalwilo 25:8) Abalahama paādi na myaka 175, wādi usangala shi wavuluka būmi bwandi bonso. Mwanda waka? Mwanda bulunda bwandi na Yehova bwādi nyeke na mvubu mikatampe. Inoko, potutanga’mba Abalahama wādi mununu “byamwiko, myaka mifikile’tu she,” kino kekishintululapo amba kākidipo na buya bwa kwikala na būmi mu mafuku a kumeso.

16. Le Abalahama ukemwena nsangaji’ka mu Paladisa?

¹⁶ Bible unena’mba Abalahama “wādi wilaija kibundi kya byalwilo bya bine, Leza ye sendwe wēkifwatakenye ne mūbaki wakyo.” (Bahebelu 11:10) Abalahama wādi ukulupile amba dyakadilwe kantu dino, ukamonanga kibundi’kya, ke Bulopwe bwa Leza buludika ntanda yonso kadi. Bine, ukekimonanga! Langa’po bidi mukasangela Abalahama kwikala mu paladisa pano pa ntanda ne kwendelela kuningisha bulunda bwandi na Yehova. Bine, ukasangala pa kuyuka amba kimfwa kyandi kya lwitabijo i kikwashe bengidi ba Leza mu tununu ne tununu twa myaka! Mu Paladisa ukajingulula amba kitapwa kya ku Lūlu lwa Modia kyādi kyelekeja kintu kya mvubu mikatampe. (Bahebelu 11:19) Kadi ukayuka’mba misanshi yaāivwene paādi usaka kulambula wandi mwana Izake bu kitapwa, yākweshe bantu midiyo ne midiyo ba kikōkeji bevwanije misanshi yāivwene Yehova, paāpēne wandi Mwana Yesu Kidishitu bu kinkūlwa pa mwanda wa bantu. (Yoano 3:16) Kimfwa kya Abalahama i kitukwashe batwe bonso tusangele bininge kinkūlwa, kilongwa kya buswe bukatampe!

17. Le ubasumininwa kulonga bika, ne i bika byotukabandaula mu kishinte kilonda’ko?

¹⁷ Shi ke pano tusumininwei kwiula lwitabijo lwa Abalahama. Pamo bwa aye, tusakilwa buyuki ne kwimwena bintu. Ponso potwendelela kwifunda bivule padi Yehova, tukemwena madyese ne bulami bwandi. (Tanga Bahebelu 6:10-12.) Bine tulomba Yehova ekale mulunda netu nyeke! Mu kishinte kilonda’ko, tukabandaula’mo bimfwa bisatu bikwabo bya bantu ba kikōkeji bāikele kusamba bulunda na Leza.