Mpupo 10

TALA bino bifwatulo. Kimo ne kimo kilombolanga kipupo kyāletele Yehova pa Edipito. Pa kifwatulo kibajinji ukokeja kumona Alone ukupila mukombo wandi pa Munonga wa Nile. Penepa mema āalamuka ke mashi. Mwita wa lui onso wāfwa ne munonga wāshilula kununka bibi.

Kupwa Yehova wākandija byula kutamba mu Munonga wa Nile. Byāzambalala ponso—mu mafiya, mu bikombola bya mikate, ne pa bitanda bilāla bantu pene—ponso’tu. Byula pa kufwa, Bene Edipito bebibunga milwi ne milwi, kadi byanunka ntanda yonso.

Kupwa Alone wākupila mukombo wandi panshi, luvumbi lwāalamuka ke tumwe. Twishi twa masala tusumana bisansa. Tumwe kyo kyādi kipupo kya busatu pa ntanda ya Edipito.

Bipupo byashala byāponēne’nka Bene Edipito kete, kebyāponēnepo Bene Isalela. Kipupo kya buná yādi mpekepeke yāyudile mu mobo a Bene Edipito onso. Kipupo kya butano kyāponēne banyema. Bañombe, mikōko, ne bambuji ba bene Edipito bangi bāfwa.

Kupwa, ba Mosesa ne Alone bāyata buto, bebwela mūlu. Bwālonga bantu tubenga ne banyema bene. Kino i kipupo kya busamba.

Ebiya Mosesa wāolola kuboko mūlu, Yehova nandi wāleta mikungulo ne mvula wa mabwe. Kekwāikelepo mvula mubi namino mu Edipito.

Kipupo kya mwanda kyādi kya bibumbo bya njie. Ino njie mingi namino keyāikele’ko kadi keikekala’kopo. Yādile kintu kyonso kekyāonakanibwepo na mvula wa mabwe.

Kipupo kya kitema kyādi kya fukutu. Umbula mwa mafuku asatu fukutu bwī yādi myandabale pa ntanda, inoko mwinya wādi mu bīkalo bya Bene Isalela.

Ku mfulo Leza wānena bantu bandi bashinge mashi a kana ka mbuji nansha kana ka mukōko pa ñunji ya bibelo. Kupwa mwikeulu wa Leza wāpita mu Edipito. Ponso paādi umona mashi, kādipo wipaya muntu mu yayo njibo. Ino mu mobo onso akubulwa mashi pa ñunji ya bibelo, mwikeulu wa Leza wādi wipaya bana babubedi ba bantu ne ba banyema bene. Kino ye kipupo kya 10.

Pa kino kipupo kya mfulo, Felo wānena Bene Isalela bataluke. Bantu ba Leza bonso bādi batengele lwendo, bonka bufuku’bwa bātamba mu Edipito.