Batubedibedi 12

TALA bipa biselele bano bana-balume. Tala mubaile kisampo kya mañanza. I kitembekwa enka na bana-balume babidi. Tala ne bipa bya mukuyu ne makamamanga. Bino bipa bilumbuluke nenki bibatambe kwepi? I ku ntanda ya Kenani. Vuluka, mu Kenani ye mwāshikete Abalahama, Isake ne Yakoba mu kitatyi kampanda. Ino pa mwanda wa nzala yāponene’ko, Yakoba ne kisaka kyandi bāvilukīle mu Edipito. Pano, kepadi kubwipi kwa myaka 216, Mosesa ukunkwijanga Bene Isalela mu Kenani. Kebadi pa Kadesha mu ntanda mutuputupu.

Ino mu ntanda ya Kenani mudi bantu babi. Penepo Mosesa watume batubedibedi 12, kaebanena’mba: ‘Endai, kajingululei shi i bantu banga bekele’mo, ne badi na bukomo bwa muswelo’ka. Mujingulule ne biloba shi bidi na bumeni buyampe. Kadi kemwakilwai kupaika’mo bipa bimobimo.’

Bano batubedibedi pa kujokela ku Kadesha, abasapwila Mosesa’mba: ‘Ntanda i milumbuluke kashā.’ Abape Mosesa bipa mwanda wa kulombola’mba i bya bine. Ino batubedibedi 10 abanena’mba: ‘Bantu bashikete’mo i bapuñame ne bakomo. Shi tusomonwe kukanyongolola yoya ntanda, tukepaibwa fututu.’

Bene Isalela pa kwivwana owa musapu, abakwatwa moyo. Kebanena’mba: ‘I kiyampe shi twafwidile’nka mu Edipito’mwa nansha kufwila muno mu ntanda mutuputupu. Tusa kwipaibwa ku bulwi, bakaji betu ne betu bana basa kuselwa bu misungi. Tutongei mwendeji ungi kuleka Mosesa, tukajokele mu Edipito!’

Ino batubedibedi babidi bakulupile mudi Yehova, abatompa kusenga bantu. Majina abo i Yoshua ne Kalebu. Abanena’mba: ‘Kemukikwatwa moyo. Yehova udi netu. I kipēla kunyongolola yoya ntanda.’ Ino bantu kwivwana mpika. Kupwa kebasake kwipaya Yoshua ne Kalebu.

Pa kino, Yehova wakalabala, wanena Mosesa’mba: ‘Kutupu muntu nansha umo udi na myaka 20 ne kupita’po ukatwela mu ntanda ya Kenani. I bamone bingelengele byonalongele mu Edipito ne mu ntanda mutuputupu, ino kunkulupila mpika. Shi ke pano bakalumbakana mu ntanda mutuputupu myaka 40 kufika’nka ne muntu wa mfulo afwe. Enka Yoshua ne Kalebu kete bo bakatwela mu ntanda ya Kenani.’