Lehaba Wafi Batubedibedi

BANO bana-balume badi mu kyaka. Bafwaninwe kunyema, shi bitupu basa kwipaibwa. I batubedibedi Bene Isalela, ne mwana-mukaji wibakwasha’u i Lehaba. Lehaba wikalanga mu njibo ya pangala pa nsakwa ya kibundi kya Yediko. Tutalei bidi kikadile bano bana-balume mu kyaka.

Bene Isalela kebadi pabwipi na kwabuka Munonga wa Yodano ne kutwela mu ntanda ya Kenani. Ino kumeso kwa kutwela, Yoshua watume batubedibedi babidi. Webalombola’mba: ‘Endai mukabele ntanda ne kibundi kya Yediko.’

Batubedibedi pa kufika mu Yediko, abaenda ku njibo ya Lehaba. Ino muntu kampanda wakasapwila mulopwe wa Yediko’mba: ‘Kudi Bene Isalela babidi baile muno bufuku mwanda wa kubela ntanda.’ Mulopwe pa kwivwana uno mwanda, watume bana-balume kudi Lehaba, nabo abamunena’mba: ‘Tambija bana-balume bodi nabo mu njibo!’ Ino Lehaba webafi pa musaka wa njibo. Kupwa webanena’mba: ‘Kudi bana-balume baiyanga kuno kwami, ino nkiyukilepo shi badi ba kwepi. Ke balupuke kala pa kapita’ka-i-kāni, kumeso kwa kushita kibelo kya kibundi. Shi mupeje mukebapeta!’ Penepo bano bantu baenda kwibalonda.

Bapwa’tu kutamba, Lehaba wakanda lubilo pa musaka. Kanena batubedibedi’mba: ‘Ndyukile’mba Yehova ukemupanga ino ntanda. Twaivwene mwawaumijije mema a Kalunga Katyila pomwatambile mu Edipito, kadi ne momwaipaile mulopwe Shihone ne mulopwe Oka. Ami nemulongela biyampe, nanshi nemwisāshila, ntyipilei bidi’mba nenu mukanongela biyampe. Mukapandija tata ne lolo, batutu ne bakaka.’

Batubedibedi abatyipe kulongela monka, inoko Lehaba wadi ufwaninwe kulonga kintu kampanda. Batubedibedi abamunena’mba: ‘Kwata uno monji utyila, ukute’o pa dididisha dya njibo yobe, kadi bungila ba ku musuku obe bonso mu njibo yobe ne abe mwine kumo. Potukajoka kukwata Yediko, tukamona uno monji pa dididisha dya njibo yobe, netu tukakūla yense ukekala mu njibo yobe.’ Batubedibedi pa kujokela kudi Yoshua, abamusapwila monso mobyāpityile.