KIFUNDWA 3
Lehaba Wāitabije Mudi Yehova
Wimone bidi na abe udi mu kibundi kya Yediko. Yediko i kibundi kya mu ntanda ya Kenani, mudi bantu bampikwa kwitabija mudi Yehova. Mo mushikatanga mwana-mukaji wa dijina dya bu Lehaba.
Lehaba paākidi nsongwakaji, wāivwene mānga ya mwākalañeninye Mosesa mema a Kalunga Katyila ne kutambija bene Isalela mu Edipito. Kadi wāivwene ne lusango lwa mwēbakwashishe Yehova banekenye balwana nabo ku mavita. Ino pano waivwana’mba bene Isalela abatūla nkambi kubwipi na Yediko!
Lehaba wāpandije batubedibedi mwanda wādi witabije mudi Yehova
Difuku dimo nenki kyolwa, bene Isalela babidi abaenda ku Yediko kukabela kibundi. Abafika kwa Lehaba. Nandi webatundaila. Bufuku, mulopwe wa Yediko wayuka’mba batubedibedi abatwela mu kibundi ne amba badi kwa Lehaba. Ponka’po mulopwe watume bantu bakebakwate. Ino Lehaba wafi bano batubedibedi mu musaka wa yandi njibo ne kulombola bantu ba mulopwe’mba: ‘Eyo batubedibedi badi kuno, ino kebatambe kala mu kibundi. Shi mwibalonde bukidi musa kwibapeta.’ Le uyukile mwanda waka Lehaba wapandija bano batubedibedi?— I mwanda wādi ukulupile mudi Yehova kadi wādi uyukile amba Yehova usa kupa bene Isalela ntanda ya Kenani.
Batubedibedi pa kutamba mu njibo ya Lehaba, abamulaya’mba aye ne ba mu kyabo kisaka, basa kupanda pasa konakanibwa Yediko. Le uyukile byobamunena kulonga?— Abamunena’mba: ‘Sela uno monji utyila ukute’o ku dididisha. Nabya, muntu ense ukekala mu ino yobe njibo ukapanda.’ Lehaba walonga byonso byamulombola batubedibedi. Le uyukile byalongekele mafuku kumeso?—
Yehova wāpandije Lehaba ne kyabo kisaka
Papita’tu mafuku matyetye, bene Isalela aba bajokoloka kibundi mu nyā. Abajokoloka kibundi kyonso musunsa umo ku difuku mu mafuku asamba. Ino mu difuku dya busamba-bubidi dyonkadyonka abajokoloka’kyo misunsa isamba-ibidi. Kupwa abatūta kyungwe kine kyakyo. Yehova waponeja mumbu ijokolokele kibundi panshi, kakangabanga! Ino’nka njibo ikutyilwe’ko monji utyila pa dididisha aya kashā imene! Lelo ubeimone pa kifwatulo?— Lehaba ne ba mu kisaka kyabo abapande!
Le i ñeni’ka yowaboila kudi Lehaba?— Lehaba wāitabije mudi Yehova, mwanda wāivwene bintu bivule bya kutendelwa byālongele Yehova. Nobe pano yeu wifunda bintu bivule bya kutendelwa bilongele Yehova. Le ubaitabija mudi Yehova pamo bwa Lehaba?— Tuyukile’mba witabije!