Leza Walaya Paladisa

KINO i kifwatulo kya paladisa mungya mwēilombwedile Leza kudi Isaya mupolofeto wandi. Isaya wāikele’ko kitatyi kityetye kupwa kwa Yona.

Kishima paladisa kishintulula amba “budimi” nansha “kyombe.” Mwene kino kibakuvuluja kintu kyoketudi bafunde mu dino dibuku? Idi’nka bwa budimi bulumbuluke bwālongēlwe ba Adama ne Eva na Yehova Leza, mwene i amo? Ino lelo ntanda yonso ikekalanga bu paladisa monka?

Yehova wāsapwidile mupolofeto Isaya asonekele bantu ba Leza myanda itala paladisa. Wānene’mba: ‘Bampumpi ne mikōko bakekalanga pamo mu ndoe. Bañombe bana ne bana ba bantambo bakadya madyo amo, ne mwanuke ukebendejanga. Mwana mutyetye nandi kakasumwepo na nyoka wa bulembe shi ukaila kubwipi nandi.’

Bavule bakanena’mba: ‘Kebikekalanga’kopo. Pano pa ntanda padi kavutakanya nyeke, kadi kakendelela’nka nenki.’ Ino langa’po bidi: Leza wāpele ba Adama ne Eva kifuko kya muswelo’ka?

Leza wātūdile ba Adama ne Eva mu paladisa. Bājimije kino kifuko kilumbuluke mwanda kebākōkelepo Leza, kupwa bānunupa ne kufwa. Leza i mulaye kupa bantu bamusenswe bintu byājimije ba Adama ne Eva.

Mu paladisa īya’ko’i, kemukekalangapo kintu kisanshija nansha kyonakanya. Mukekalanga enka ndoe ya binebine. Bantu bonso bakekalanga bakomo kadi mu nsangaji. Ikekalanga’nka mwādi mwiisakila Leza ku ngalwilo. Ino kotuya’ku, tukefundanga mukebiletela Leza.