Leza Wakwasha Mulopwe Hezekia

UYUKILE mwanda waka yeu muntu ulombelanga kudi Yehova? Mwanda waka ulādikile mikanda kumeso kwa madabahu a Yehova? Uno muntu i Hezekia. I mulopwe wa bisaka bibidi bya kunshi bya Isalela. I mūminwe bininge. Mwanda waka?

Mwanda Bene Ashidia ke bonakanye bisaka 10 bya kungala. Yehova walekele bebyonakanye mwanda byadi bibi. Pano Bene Ashidia abaiya kulwa na bulopwe bwa bisaka bibidi.

Mulopwe wa Ashidia ke mutumine kala Mulopwe Hezekia mikanda. Ye mikanda itūdile Hezekia ku meso a Leza’i. I mikanda ifutulula Yehova ne ilombola Hezekia atuyuke. O mwanda Hezekia kalombela’mba: ‘A Yehova, witukūle kudi mulopwe wa Ashidia. Nankyo mizo yonso ikayuka’mba abe umo kete ye Leza wa bine.’ Lelo Yehova usa kwivwana Hezekia?

Hezekia i mulopwe muyampe. Kadipo bwa balopwe babi ba mu bulopwe bwa bisaka 10 bya Isalela, kadi kadipo pamo bwa shandi Mulopwe umbi Ahaza. Hezekia i mukengelele kukōkela bijila byonso bya Yehova. Hezekia upwa’tu kulombela, mupolofeto Isaya wamutumina misapu itamba kudi Yehova’mba: ‘Mulopwe wa Ashidia kakatwelapo mu Yelusalema. I kutupu sola wabo ukafwena kubwipi. Kebakela’mopo muketo nansha umo.’

Tala kifwatulo kya pa dino dyani. Uyukile basola bonso’ba i bāni? I Bene Ashidia. Yehova watume mwikeulu, nandi waipaya basola Bene Ashidia 185 000 mu bufuku bumo. Kupwa mulopwe wa Ashidia watuyuka ne kujokela kwandi.

Bulopwe bwa bisaka bibidi bubapande, ne bantu abashikata kitatyi kityetye mu ndoe. Ino Hezekia pa kufwa, wandi mwana Manase wabikala. Manase ne Amona wandi mwana wamupyene, i balopwe babi bininge. Penepo ntanda ibayula monka butapani ne bupolapola. Ino Mulopwe Amona pa kutapwa na bengidi bandi, wandi mwana Yoshia wabikala mu bulopwe bwa bisaka bibidi.