Fwenai Kudi Leza

Witulēmekele na Kwitupa Bwanapabo bwa Kwitongela

2 BALOPWE 18:1-7

BAMBUTWILE banenwe kuleta kimfwa kiyampe ku babo bana. Lupusa luyampe lwa bambutwile lukokeja kukwasha bana batamije ngikadila milumbuluke ne kutonga butongi buyampe mu būmi. Ino i kya bulanda, bambutwile bavule bapanga babo bana kimfwa kityani. Le babo bana banenwe’nka kukankalwa? Tutana malondololo mu buno bubinebine bukulupilwa​—Yehova Leza witulēmekele na kwitupa bwanapabo bwa kwitongela. Tutalei kimfwa kya Hezekia kidi mu 2 Balopwe 18:1-7.

Hezekia i “mwana Ahaza mulopwe wa Yuda.” (vese 1) Ahaza wāsonsolwele bantu ku mutōtelo utōka wa Yehova. Uno mulopwe mubi wākwatakenye butōtyi bwa Bala ne bisela byabo bya kwela bantu bu bitapwa. Wāipaya ku kipete banababo na Hezekia. Ahaza wāshityidila binjilo bya tempelo ne “wepungila madabahu mu mafinko onsololo a Yelusalema.” “Wakolomona bulobo bwa Yehova.” (2 Bilongwa 28:3, 24, 25) Bibamweka patōka amba, Hezekia wādi na shandi mubi mpata. Ino lelo Hezekia wādi unenwe’nka kupita mu bilubo bya shandi?

Hezekia pa kupingakana shandi Ahaza pa lupona, ponka’po byamweka amba kāponenepo mu kilubo kya kulonda kimfwa kibi kya shandi. Hezekia “walonga kyokya kyoloke mu meso a Yehova.” (Vese 3) Hezekia wākulupile mudi Yehova, ne “kekwadipo nansha umo pamo bwa aye umbukata mwa balopwe bonsololo ba Yuda.” (Vese 5) Mu mwaka umbajinji wa umbikalo wandi, mulopwe nkasampe washilula kushinta mutōtelo na kufundula mitenta, kwine kwādi kutōtelwa bankishi ba Bajentaila. Ebiya tempelo yashitulwa, ne mutōtelo utōka wajokejibwa. (Vese 4; 2 Bilongwa 29:1-3, 27-31) Hezekia “walamete kudi Yehova . . . , ebiyampe Yehova wādi nandi.”​—Vese 6, 7.

Lelo i bika byākweshe Hezekia akomene kimfwa kibi kya shandi? Lelo bibwanika Abidya, inandi​—nansha byoketuyukile bivule pādi—​ye wāpele wandi mwana kimfwa kiyampe? Lelo kimfwa kiyampe kya Isaya, wāshilwile mwingilo wandi wa bupolofeto kumeso kwa Hezekia kubutulwa, kyo kyālondele uno nkasampe mwanā mulopwe?a Bible kanenenepo kintu pa uno mwanda. Nansha bikale namani, bubine i buno: Hezekia wātongele kwikala na būmi bwishile kulampe na bwa shandi.

Kimfwa kya Hezekia kikankamikanga muntu yense utanwa na makambakano mu bunkasampe mwanda wa kimfwa kibi kya bambutwile. Myanda ya kala i mikomo kushinta; ketubwanyapo kwilwa misanshi ya byetufikile pa kala. Ino kino kekishintululapo amba tunenwe’nka kukankalwa. Tukokeja kutonga butongi bubwanya kuketuletela nsangaji kumeso. Pamo bwa Hezekia, tukokeja kuswa Yehova Leza wa bine ne kumutōta. Kulonga namino kuketutwala ku būmi bwa nsangaji dyalelo, ne būmi bwa nyeke mu ntanda mipya ya Leza. (2 Petelo 3:13; Kusokwelwa 21:3, 4) Bine tufwaninwe kufwija’ko Leza wa buswe witulēmekele na kwitupa batwe bonso kyabuntu kitabuke bulēme​—ke bwanapabo bwa kwitongela kadi!

[Kunshi kwa dyani]