Kuselwa bu Misungi mu Babiloni Kutūla ku Kūbakululwa kwa Nsakwa ya Yelusalema

Bene Isalela pobādi bu bapika mu Babiloni, bātenwe na matompo mavule pa mwanda wa lwitabijo lwabo. Ba Shadelake, Meshake ne Abedenengo bāelelwe mu nkelwa ya mudilo, ino Leza wēbatambija’mo bōmi. Mwenda mafuku, kupwa kwa kutyumunwa kwa Babiloni na Bene Mede ne Bene Peleshia, Danyele wāelwa mu muta wa bantambo, ino Leza wāmulama na kumuma byakanwa bya bantambo.

Ku mfulo, Shilusa mulopwe wa Peleshia wākutulula Bene Isalela. Bākajokela mu ntanda yabo kupwa kwa myaka 70 tamba pobāselelwe bu misungi mu Babiloni. Kintu kibajinji kyobālongele pa kujokela mu Yelusalema, i kūbaka tempelo ya Yehova. Ino lubilo lonka balwana bāimika mwingilo wabo. O mwanda bāvuile tempelo kupwa kwa myaka 22 tamba pobājokele mu Yelusalema.

Kupwa tukefunda mwanda utala kujokela kwa Ezela mu Yelusalema mwanda wa kuneñenya tempelo. Papo ke papite kubwipi kwa myaka 47 tamba tempelo ipwa. Kupwa, myaka 13 Ezela ke mujoke, Nehemia wāubakulula nsakwa ya Yelusalema yābundwilwe. KIPINDI 5 kidi na mānga yāpityile mu myaka 152 ya mu kine kitatyi’kya.