Danyele mu Muta wa Bantambo

EE! BIMWEKA bu Danyele udi mu malwa makatampe. Inoko bantambo kebamudilepo! Uyukile i mwanda waka? Le ani waela Danyele mu bano bantambo? Tutalei bidi.

Pano mulopwe wa Babiloni i Dadiusa. Usenswe Danyele bininge mwanda Danyele udi biyampe kadi udi na ñeni. Dadiusa watonge Danyele bu mukulumpe mwendeji mu bulopwe bwandi. Ino bantu bakwabo abakwatyilwa Danyele mukao, pano tala kyobalonga.

Abaenda kudi Dadiusa kebamunena’mba: ‘A mulopwe, tubeivwanika utūle kijila kya’mba, mu mafuku 30 i kutupu wa kutōta leza nansha muntu ungi, poso abe mulopwe. Muntu wa kupela ukelwa mu bantambo.’ Dadiusa kayukilepo kisakila bano bantu kino kijila. Ino wamone bu i kiyampe, penepo walembeja kino kijila. Pano kijila kekikyalamunwapo.

Danyele pa kwivwana kino kijila, waenda kwandi kalombela’nka mwalongelanga nyeke. Bantu babi’ba bayukile amba Danyele kakalekapo kutōta Yehova. Abasangala mwanda bimweka bu mpango yabo ya kutalula Danyele isa kufikidila.

Mulopwe Dadiusa wealakanya pa kuyuka kyadi kisakila bantu kino kijila. Nandi kakishintapo kijila, penepo wanena bele Danyele mu muta wa bantambo. Ino mulopwe wanena Danyele’mba: ‘Nkulupile’mba Leza obe oingidila ukakupandija.’

Dadiusa watompola ne kulāla mpika bufuku’bwa. Pa kukya’bo, wanyemena ku muta wa bantambo. Mutale popa. Waela lubila’mba: ‘Danyele, mwingidi wa Leza mūmi! Lelo Leza oingidilanga wakupandija ku bantambo?’

Danyele walondolola’mba: ‘Leza watume mwikeulu, nandi wamume byakanwa bya bantambo kutyina’mba bakandya.’

Mulopwe wasangala. Wanena bābule Danyele mu muta. Kupwa waeleja’mo bantu babi basakile Danyele elwe mu bantambo. Kebafikilepo ne panshi pene, bantambo abebafyonte ne kutyumuna mikupa yabo.

Kupwa Mulopwe Dadiusa walembela bantu bonso ba mu bulopwe bwandi’mba: ‘Nasoñanya’mba, muntu yense alēmeke Leza wa Danyele. Walonga kingelengele kikatampe. Wapandija Danyele ku bantambo.’