Danyele mu Mutá wa Bantambo

Mulopwe mukwabo wābikele mu Babiloni i Dadiusa, mwine Mede. Dadiusa wāmwene Danyele bu mwishile na bakwabo. Wāmutūla bu mukatampe wa bantu ba bulēme ba mu ntanda’ya. Bano bantu ba bulēme, bākwatyilwe Danyele mukao kebasake kumwipaya. Abo pa kujingulula’mba Danyele ulombelanga kudi Yehova misunsa isatu pa difuku, bākasapwila Dadiusa amba: ‘A mulopwe, kufwaninwe kutūlwa kijila kinena’mba bantu bonso bafwaninwe kulombela’nka kudi abe kete. Muntu yense utyumuna kino kijila ufwaninwe kwelwa mu mutá muyule bantambo.’ Dadiusa wāsangedile uno mulangwe, wāshinya ne pa kijila’pa.

Danyele pa kwivwana myanda ya kino kijila kipya, wākatwela mu njibo yandi. Wātadidila ku dididisha dishitule, wāfukata mu manwi kalombela kudi Yehova. Bantu ba mukao’ba bāmutwelela mu njibo, bāmutana ulombela. Bāenda lubilo kukasapwila Dadiusa amba: ‘Danyele kakukōkelepo. Ulombelanga kudi Leza wandi misunsa isatu difuku ne difuku.’ Dadiusa wādi usenswe Danyele, kadi kādipo usaka afwe. Difuku dyonso dituntulu, Dadiusa wādi’nka ulangulukila pa mwa kupandijija Danyele. Inoko nansha ke mulopwe mwine kādipo ubwanya kushinta kijila kyakadi mushinye kala. Wādi unenwe’nka kusoñanya bantu bandi bakele Danyele mu mutá wa bantambo balobo.

Mu dine difuku’dya bufuku, Dadiusa wādi muvutakanibwe ñeni pa mwanda wa Danyele, wākomenwa’nka ne kulāla. Bukya lubanga, wāenda lubilo ku mutá, wāela Danyele lubila’mba: ‘Lelo Leza obe wakupandija?’

Dadiusa wāivwana diwi. Dyādi diwi dya Danyele! Danyele wālondolola Dadiusa amba: ‘Mwikeulu wa Yehova wamumenga byakanwa bya bantambo. Kebansanshijepo.’ Dadiusa wāsangele bininge! Wāsoñanya bābule Danyele mu mutá. Danyele kādipo na māla mamukonde ku ngitu yandi. Ebiya mulopwe wāsoñanya’mba: ‘Elai mu mutá bantu basambīle Danyele.’ Bano bantu pobāelelwe mu mutá, bantambo bēbabokota.

Dadiusa wāeleja lubila mu bantu bandi amba: ‘Muntu yense ufwaninwe kutyina Leza wa Danyele. Mwanda wakūla Danyele ku bantambo.’

Le nobe ulombelanga Yehova difuku ne difuku, pamo bwa Danyele?