Yesu Ke Mūmi

LELO uyukile mwana-mukaji ne bana-balume babidi’ba? Mwana-mukaji i Madia Madaleni, mulunda na Yesu. Bana-balume bavwele bitōka’ba i bamwikeulu. Mu kakyumba mutala Madia’mu ye mwatūdilwe umbidi wa Yesu kupwa kufwa kwandi. Ketwanga bu kibundu. Inoko umbidi ke mutupu’o! I ani weusela? Tutalei.

Yesu pa kufwa, babitobo abakanena Pilato amba: ‘Yesu paadi ukidi mūmi, wanene’mba ukasangukanga kupwa kwa mafuku asatu. Nanshi nena bantu bakalame kibundu kyandi. Kutyina’mba bandi bana ba bwanga bakeba umbidi wandi kebanena’mba wasanguka!’ Penepo Pilato wanena babitobo batume basola ba kukalama kibundu.

Ino na futwi mu difuku dya busatu, kupwa kwa lufu lwa Yesu, mwikeulu wa Yehova waiya. Watalula dibwe ku kibundu. Basola abakwatwa moyo, abakomenwa ne kujina kwine. Ku mfulo, abatale mu kibundu, ino umbidi mutupu’o! Basola bamo abaenda kukalombola babitobo mu kibundi. Uyukile byalonga bano babitobo babi? Abafuta basola mwanda wa babepe bubela. Abanena basola’mba: ‘Nenai’mba bandi bana ba bwanga badi abaiya kwiba umbidi bufuku batwe tulēle.’

Ponka’po, bana-bakaji bamobamo balunda na Yesu abakapempula kibundu. Abatulumuka pa kutana mu kibundu mutupu! Ebiya bamwikeulu babidi ba bisandi bikelema abamweka. Abaipangula’mba: ‘Le i kika kyomukimbila Yesu kuno? I musanguke. Endai bukidi mukalombole bandi bana ba bwanga.’ Bana-bakaji abanyema lubilo kashā! Ino mwana-mulume umo webemika mwishinda. Umuyukile i ani? I Yesu! Wanena’mba: ‘Kalombolei bami bana ba bwanga.’

Bano bana-bakaji pa kusapwila bana ba bwanga’mba Yesu wasanguka kadi amba badi abamumone, bana ba bwanga abapatanya. Petelo ne Yoano abanyemena ku kibundu’mba bakemwene abo bene, ino abatana mu kibundu mutupu! Ba Petelo ne Yoano pa kutaluka, Madia Madaleni washala kunyuma. Ye pano patala munda ne kumona bamwikeulu babidi.

Uyukile kwāendele umbidi wa Yesu? Leza wēujimankenye. Leza kāsangwilepo Yesu na umbidi wa misunya waāfwile nao. Wāpele Yesu umbidi umpya wa ku mushipiditu mwikadile wa bamwikeulu ba mūlu. Ino pa kulombola bandi bana ba bwanga’mba i musanguke, Yesu wāvwele umbidi umweka ku bantu, enka na motusa kwifundila’kyo.