Shapita 128

Yesu Ke Mūmi!

BANA-BAKAJI pa kutana mu kibundu mwadi Yesu ke mutupu’ye, Madia Madaleni wanyema lubilo kakasapwila ba Petelo ne Yoano. Ino bana-bakaji bakwabo abashala ku kibundu. Kepejijepo, mwikeulu webamwekela, kaebete batwele’mo.

Bana-bakaji abamone’mo ne mwikeulu mukwabo, umo pa bano bamwikeulu webanena’mba: “Kemukikwatwa na moyo. Nami ngyūkile o mukimba’o i Yesu waipaīlwe ku [mutyi]. Muno i mutupu’ye wasanguka monka mwādi unenena. Iyai mutalei bidi ne mwādi ulēle Mfumwetu. Ino endai lubilo lonka mukasapwilei bāna-bandi-babwanga’mba wasanguka mu lufu.” Bano bana-bakaji abatapula lubilo kebenda na moyo ne kusepelela kukatampe.

Papo Madia watana ba Petelo ne Yoano kaebasekunwina’mba: “Abalupula Mfumwetu mu kibundu [kivulukwa] ketuyūkilepo ne ko bakamutūla.” Bano batumibwa babidi abataluka kebenda’ko lubilo. Yoano upēlwa ku maulu—byadi mwanuke—wabadikila kufika ku kibundu. Watana bana-bakaji ke bataluke’ko, kutupu muntu. Yoano wabandama katale mu kibundu, ino aye panja, wamone’mo bipeta.

Petelo pa kufika kekakilepo, wapitaila’tu pityipityi ne munda. Wamone’mo bipeta bilēle ne kisandi kyakutyilwe Yesu ku mutwe, kivunge, ino akyo’ko pakyo bwa pala. Yoano nandi watwela mu kibundu, ye kwitabija waitabija lusango lwa Madia. Ino ne Petelo, ne Yoano, kukulupila mpika amba Yesu i musanguke nansha byaadi wibasapwila pavule amba usa kusanguka. Bibebapu bunwa, kebajokela kwabo abo bonso babidi, ino Madia wadi wajokela ku kibundu washala konka.

Papo bana-bakaji bakwabo benda lubilo kukasapwila bana-babwanga amba Yesu wasanguka, mwadi mwibasoñaninye bamwikeulu. Abo bepeneneka na lubilo, Yesu webasambakana, kaebanena’mba: “Mwakomai po!” (BB) Abaponena ku maulu kebamwivukwila. Kupwa, Yesu webanena’mba: “Kemukikwatwa na moyo. Nanshi endai mukasapwile bāna betu bapite ku Ngadilea’ko bakantāne konka.”

Kitatyi kityetye kunyuma, padi pabatekuka kintenshi ne bamwikeulu abamweka, bashidika banzamu badi ababozokelwa, abaūme kitumbuzaji tē pamo bwa bafwe. Mu meso mwibatōkele’tu, abaendelela mu kibundi kukasapwila babitobo bakatampe byonso bilongekele. Babitobo bakatampe nabo abebāba na “bakulumpe” ba Bayuda, abakwata’po ñeni ya kupūta mwanda, abape bashidika bya majika-kanwa. Kebebasoñanya’mba: “Nenai amba: Bāna-bandi-babwanga abaiya kumwiba bufuku bātwe tulēle.”

Bashidika bene Loma bapebwanga mfuto ya kwipaibwa shi abalāla tulo ku kaji, o mwanda babitobo abatyipila bano bashidika’mba: “Shi uno mwanda [wa kulāla ku mingilo kwenu] wivwanwe kudi mbikavu nankyo netu tukamulonga, tumusenge biyampe, kepakēkalapo ne mwanda mwine ko mudi, mhm.” Bashidika abalongela monka mobebanenene mwanda bya majika-kanwa byobapelwe i bivule mpata. Enka namino, uno mwanda wa bubela wa’mba umbidi wa Yesu i mwibwe ubasambakana mu Bayuda monso.

Madia Madaleni ushele ku kibundu weteneka ku milangwe kadila. Lelo Yesu udi kwepi? Waimana kumeso kwa kibundu katale munda, wamone’mo bamwikeulu babidi bavwele bitōka, abamweka monka! Umo ushikete ku mitwe, mukwabo ku maulu kwa padi palēle umbidi wa Yesu. “Abe mwana-mukaji, le kika kyōdila?” bo abo bamwipangula.

“Ndilanga Mfumwami o batekuna,” ye Madia ulondolola, “nkiyūkilepo nansha ko bakamutūla kwine.” Kupwa waalamuka, wamone muntu mukwabo, nandi wapituluka mu kipangujo kimo kyonka’mba: “Abe mwana-mukaji, le bika byōdila?” Uno muntu waipangula kadi amba: “I ani le ōkimba?”

Madia walanga’mba uno muntu i kalama wa budimi budi’mo kibundu, kamunena’mba: “Mfumwami, shi i abe wamutekuna nankyo unombole ko wakamutūla nkamushikuneko.”

“Abe Madia!” ye uno muntu umunena. Nandi wamujiwididila ku muneneno wamunenanga nyeke, amba i Yesu. Weela mūlu amba: “Laboni!” (ko kunena’mba “Mufundiji”). Madia na kitumbuzaji kya nsangaji, kakamukwata. Ino Yesu amba: “Mhm, kokankwata, ke-ne-muntu nkyakandile kudi Tata. Nanshi enda ku bāna betu ukebasapwile’mba: Yewa kakakanda kudi Shandi, kadi i wenu Shenu, kudi Leza wandi ne Leza wenu.”

Madia watalukididila kaenda lubilo kungwidile batumibwa ne bana-babwanga. Nandi watuntwila musapu pa lusango lwadi lusapwile kala bana-bakaji bakwabo amba badi abamone Yesu musanguke. Ino bano bana-balume kebetabijepo bibasapwidile bana-bakaji babajinji, kadi mobimwekela, kebetabijepo ne bya Madia bine. Mateo 28:3-15; Mako 16:5-8; Luka 24:4-12; Yoano 20:2-18.

▪ I bika byalonga Madia Madaleni pa kutana mu kibundu mutupu, ne i bika byemwena bana-bakaji bakwabo?

▪ Ba Petelo ne Yoano abalonga kika pa kutana mu kibundu mutupu?

▪ I bika byamona bana-bakaji mu dishinda mobenda kukalombola bana-babwanga kusanguka kwa Yesu?

▪ I bika byafikila bashidika banzamu, ne babitobo abalonga kika pa kwivwana lwabo lusango?

▪ I bika byamwekela Madia Madaleni bunka bwandi ku kibundu, ne bana-babwanga abalondolola namani ku nsango yebasapwila bana-bakaji?