Bipwilo Mwanda Wa Kwitūbaka Umbuswe ne Umbumo

Padi kodi kala mutanwe ku kupwila kwa ba Tumoni twa Yehova badi pabwipi na poshikete. Watene’ko bantu ba miswelo yonso​—⁠bisaka, bankunga, bakulumpe ne bankasampe. Abo bonso bādi bekute umbumo mu mutōtelo wabo kadi bādi na nsangaji ya kwikwasha umo ku mukwabo.

Mu mpangiko yonso mudi bantu bavule basaka kwingidila umbumo, mufwaninwe kwikala bwendeji kampanda. Leza i Leza wa ndudi; omwanda ino ndudi ifwaninwe kumweka mu kipwilo kya bantu bandi. Pamo’nka na mu myaka katwa imbajinji, dyalelo nadyo, i kutongwe bakristu bana-balume babwenye bisakibwa, bapose ne babwino, bu bakulumpe nansha batadi. Bano bo abo bemanine kipwilo ne kwikilama mu myanda itala bisakibwa byakyo bya kumushipiditu. Bangulwanga’ko na bana-balume bakwabo bakikōkeji batelwa bu bengidi ba mingilo. Bano bana-balume kebatambulangapo mfutwa nansha kumwena’mo kamweno kakwabo ka lupeto, mhm, ino bengilanga ku kusaka, bengidijanga lupeto lwabo abo bene, lobasokolanga pavule mu mingilo ya kungitu.​—⁠1 Kodinda 14:33, 40; Fidipai 1:1; 1 Temote 3:​8, 9.

Lelo batoñwanga namani? Bafwaninwe kwikala bengidi ba Leza bakikōkeji babwenye bisakibwa mungya Bisonekwa. Kimfwa, kwikala ‘wa kwifula mu ngikadila, wañeni mijalale, wandudi, wakizāji, uyukile kufundija, wakubulwa kaninga-mpo; wakubulwa kusanswa lupeto; wa kulela kipango kyandi biyampe byonka; kadi ke wa kwitabijapo panopano ponka; ne wakutendelwa na boba ba panja’; ‘wakulamata pototo ku kinenwa kya bubinebine mu busendwe bwa kufundija.’​—⁠1 Temote 3:​1-15; Tetusa 1:​7-9.

Kebavotwengapo na kipwilo, mudi bavule bakidi bapya mu kwitabija bu bakristu. Ino, bana-balume batame kumushipiditu babwino, bakulumpe, bayukile kusansanya ditabula difwaninwe kufikila’po boba babwanya bisakibwa mungya Bisonekwa, ye abo balombanga’mba bana-balume kampanda bekale kutongwa bu bakulumpe pa kipwilo nansha bu bengidi ba mingilo. Kupwa kutongwa kwa bakulumpe ne bengidi ba mingilo kwalongwa munshi mwa bwendeji bwa Kitango Kyendeji kya ba Tumoni twa Yehova, mwanda wa kulonda kimfwa kyāshilwe na kipwilo kya bakristu ba mu myaka katwa imbajinji.

Bano bakulumpe, nansha batadi, kebabundilepo katango ka bantu ba pa kitenta mu kipwilo, mhm; abo ke bamfumupo batadīle bakwabo, mhm. Yewa yense utangidile kumeso i umpika wa bonso, pamo’nka na mwānenene Yesu. Mu kipwilo kya ba Tumoni twa Yehova, bakulumpe i bengidi netu mu mwingilo wa Bulopwe bwa Leza.​—⁠Mateo 20:​26, 27; 23:​8-11; Loma 12:8; 1 Kodinda 3:5; 4:​1, 2; Kolose 4:11; 1 Tesalonika 5:​12-14.

Byobadi batadi, bendejanga bifundwa ku kupwila ne kutangila kumeso mu mwingilo wa busapudi. Kitungo kibajinji kya kipwilo i kusapula myanda miyampe ya Bulopwe mu kipindi kyonso kyokipelwe. Batadi bengilanga ne bu bakumbi, bapempula bantu ba mu kipwilo mwanda wa kwibakankamika mungya bisakibwa.​—⁠Mateo 24:14; Bilongwa 1:⁠8; 1 Tesalonika 2:​11, 12; 5:​14, 15; 2 Temote 2:​24-26; Bahebelu 13:17; Yakoba 5:​13-16; 1 Petelo 5:​1-4.

Bakulumpe badi kadi na kiselwa kya kutopeka ne kōlola boba bonso badi na mwiendelejo umbi, ne boba baleta kyāka kya kusaka kusubija bu-ujila bwa kumushipiditu ne bwa mu mwikadilo, ne kusaka kuvutakanya bumo bwa kipwilo.

​—⁠1 Kodinda 5:​4, 5, 7, 11-13; Tetusa 1:9; 2:15; 3:10, 11.

Na kukwatañana na kipwilo kitatyi ne kitatyi ukekala na kisense kilumbuluke kadi ukamona byabuyabuya bivule bya kumushipiditu.—⁠Mitōto 35:18; 84:10.

• I bāni bemanine mingilo pa kipwilo ne kipwilo?

• Kutongwa kwa batadi kwimaninanga pa bika?

• Biselwa byabo le i biselwa’ka?

[Kapango pa paje 13]

Batadi bafundijanga kipwilo, batangile kumeso mu busapudi bwa ku njibo ne njibo, bakankamikanga bantu na bupempudi bwa bukumbi, bapānanga madingi ne kutopeka shi ye mokisakila