Bipwilo I Bilongololwe Mwanda wa Kusapula Bulopwe bwa Leza

Pākidi Yesu Kristu pano pantanda, wādi wenda usapula Bulopwe bwa Leza mu kibundi ne kibundi, mu mukenza ne mukenza. Kadi wāfundije ne bandi bana-babwanga kwingila uno mwingilo, kupwa wēbatuma. Kumeso kwa kukanda mūlu wāsoñenye balondi bandi amba endai mukalonge bantu ba mizo yonso ke bana-babwanga. Kipwilo kya bwine-kristu kibajinji kyādi kilongololwe mwanda wa kusapula myanda miyampe, tamba’nka ku ñanjilo kwakyo. Konso kwādi kwenda bana-babwanga, bādi basapula Bulopwe bwa Leza.​—⁠Mateo 4:17, 23; 10:​1-16; 28:​19, 20; Luka 4:43, 44; 8:1; 10:​1-9; Bilongwa 1:8; 4:31; 5:42; 8:12; 19:8; 28:​23, 30, 31; Loma 10:​9, 10, 14.

Yesu wānene umbupolofeto bwandi butala pa kuvuika kwa ngikadilo ya bintu amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” Buno busapudi kyo kiselwa kibajinji kidi pa mutwe wa kipwilo kya bwine-kristu dyalelo.

—⁠Mateo 24:​14, MB; Mako 13:10.

Kujokoloka ntanda yonso, bipwilo byonso bya ba Tumoni twa Yehova i bilongololwe mwanda wa kusambakanya mwaba obipelwe na busapudi bwa myanda miyampe ya Bulopwe bwa Leza. Mu ntanda yonso mudi bilo bya musambo wa Sosiete Watch Tower, kipwilo kyonso kipebwanga mwaba wa kusapula’mo, mwanda wa uno mwingilo wingilwe na ndudi. Kipwilo nakyo kyakalañanya mwaba wikipelwe’wa mu tubipindi tutyetutye, tupebwanga ku boba badi na kiselwa kya kuyuka i kwepi kukidi bantu basakilwa kusapwilwa.​—⁠1 Kodinda 14:​33, 40.

Ba Tumoni batananga bantu pavule na kwibafikila ku njibo ne njibo. Ba Tumoni twa Yehova bafundanga ku kupwila kwabo kwa pa kipwilo muswelo wa kushilula mīsambo na binenwa bīpi bitala pa musapu wa Bulopwe ku bibelo, bengidija ma Bible abo. Ba Tumoni baselanga mabuku esambila pa Bible a kushīla bene njibo basaka kutundulwila’ko buyuki bwabo bwa Mwanda wa Leza.

Pa kusaka’mba muntu ne muntu wa mu wabo mwaba evwane uno musapu wa Bulopwe wamvubu, ba Tumoni basonekanga tumyanda tonso tutala pa busapudi bwa ku njibo ne njibo, njibo yobadi abatana kutupu muntu, njibo yobadi abakomenwa kusapula’ko pamwanda wa buluji kampanda, ne bikwabo. Bekalanga bajoka kwibapempula kitatyi kikwabo. Basonekanga muntu yense usangela musapu, kupwa bajokela’ko kwibashintulwila myanda mikwabo itala pa Bisonekwa. Shi etabije, nankyo bakashilula nandi kifundwa kya Bible. Bino byonso biloñwanga pakubulwa kufutwa.

Kadi ba Tumoni twa Yehova bābanyanga milami ku bapityeshinda bapita mu bilayi. Kino kibapanga muswelo wa kwisamba na bantu bavule bokebakokejapo kutāna ku mobo. Baloñanga bukomo bwabinebine mwanda wa kufikila muntu yense evwane.​—⁠Bilongwa 17:17; Kusokwelwa 14:⁠6, 7; 22:17.

Mwanda’ka ba Tumoni bendelelanga na kupempula bantu nansha shi bavule kebasenswepo kwivwana musapu wabo? Ngikadilo ya bantu yalamukanga kitatyi ne kitatyi, pa kumujokela dikwabo padi muntu ukokeja kwitabija, nansha kadi ukokeja kutana muntu mukwabo enka mu kisaka’kya usangela musapu.

Yesu wāsapwidile bandi bana-babwanga’mba: “Nanshi badikilai bidi kusaka bulopwe bwa Leza, ne boloke bwandi kumo.” Kusapula Bulopwe bwa Leza i kipindi kidi na mvubu mikatampe mu mwingilo wetu wa kubadikila bidi kukimba Bulopwe, ne kadi ba Tumoni twa Yehova i betungile kino bu kitungo kikatampe umbūmi bwabo.—⁠Mateo 6:33; 2 Temote 4:⁠2.

• I mwingilo’ka wāingile Yesu ne bakristu babajinji wātobelwe amba ukengilwa ne mu kino kyetu kitatyi?

• Mwingilo wa busapudi wa ba Tumoni twa Yehova lelo i mulongololwe namani?

• Le i mwanda waka ba Tumoni bendelelanga na kupempula bantu nansha shi bantu bavule i bakubulwa kusangela musapu wabo?

[Kapango pa paje 16, 17]

Ba Tumoni twa Yehova basapula Bulopwe bwa Leza mu matanda meshileshile

Tailande, Mexike, Nederlande, Korea, Kurasao, Gana, Angeletele, Ostrali