Kusepelela Ne Kutendela Leza Ku Kubungakana

Kushilwila’nka ku ñanjilo kwa myaka ya 1880, Befundi ba Bible bājingulwile’mba, kutentekela pa kupwila kwa pa kipwilo, bafwaninwe ne kwiyuka senene na balunda nabo mu lwitabijo ba mu matanda makwabo. Penepo bāshilula kuteakanya bitango byādi bitanwa’ko Befundi ba Bible ba mu Amerika monso, kupwa ke ne ba mu Kanada. Byādi bitatyi bya kuloelelwa kwabinebine kwa kumushipiditu; mwanda bādi batambula’ko bufundiji bwa Bible bwamushike umbula bwa mafuku mavule; kadi abo bonso bādi bāsepelela mu kwikankamika kwa abo bene na bene. Kubatyijibwa kwa bapya mu lwitabijo kwāikele ke kayukeno kakatampe mu mpangiko ya bitango byādi bilongwa kitatyi ne kitatyi. Kadi bādi bakwatakanya bitatyi bya bitango mwanda wa kusambakanya musapu bininge ku bantu bonso.—⁠Loma 1:​11, 12.

Dyalelo ba Tumoni twa Yehova basepelelanga na kubungakana kwa kitatyi ne kitatyi. Pavule, kubwipi kwa bipwilo 18 kufika ku 25 i bibungilwe pamo mu bitelwa bu bipindi; bipindi bipempulwanga na batadi bendakana. Kubungakana kukatampe kuteakanibwanga misunsa ibidi ku mwaka, mu Dyamposo nansha mu Dyayenga bitupu nansha mu Dyamposo ne mu Dyayenga; kwikalanga kutanwa bipwilo byonso bya mu kipindi kituntulu.

Bitango bikatampe bya mafuku asatu nansha aná bitēlwa bu bitango bya distrike biteakanibwanga mu matanda onso musunsa umo ku mwaka, kutanwanga tununu ne tununu twa bantu pa kifuko kimo. Bino bitango bitamijanga ba Tumoni twa Yehova kumushipiditu ne bakwabo basangela mingilo yabo, kadi biletanga bukamoni ku bantu bonso.

Mpangiko ya kuno kubungakana ne ya bino bitango iteakanibwanga na Kitango Kyendeji kya ba Tumoni twa Yehova ne imaninanga pa bisakibwa bya ba Tumoni kujokoloka ntanda yonso. Mutanwanga bishinte, mīsambo, ne nsekununi ya myanda yabine yobamonanga umbusapudi, itelwa bu byakumwenako, iletwa na batadi bendakana nansha na ba Tumoni babwino ba mu bipwilo. Bakwabo nabo basekununanga muswelo obalwa na matompo ebafikilanga umbūmi bwa bwine-kristu mu ino ntanda ya bantu bakubulwa kutūla lukulupilo mudi Leza, nansha bipa byobalupula mu mwingilo. Ku bitango bya distrike kwikalanga kipindi kikwabo​—⁠kitala pa kulombola madrame a myanda ya mu Bible nansha atala pa myanda ipita umbūmi mu ano etu mafuku, bilombola muswelo ulwanga bakristu na makambakano ebafikila dyalelo.

Kadi kuletwanga ne bidibwa ne bitomibwa bya kutalaja dityima. Kino kikalanga kitatyi kilumbuluke kya kusepelela na balunda shi kupwila kubaimana. Mingilo yonso itala pa kuteakanya bino bintu ilongwanga na bengidi ba kwisakila ba umbukata mwa ba Tumoni twa Yehova. Lupeto lonso luteakanibwanga nalo kifuko ne kupota bintu bikwabo, lulupukanga ku byabuntu bitūlwanga na mutyima wa kwisakila. Mutwelwanga ku bitupu, ne kebalombenga’mopo mukongo wa lupeto.

Ubwanya kwipangula ku kipwilo kya ba Tumoni twa Yehova kidi mu kyenu kibundi, kitatyi ne kifuko kikalongwa ino mpangiko mu mwaba wenu. Kadi bakakulombola mpangiko ya lwendo ikwetwe ne muswelo wa kukamona njibo kwa kukafikila.

Kuno kubungakana ne bino bitango bikwashanga ba Tumoni twa Yehova ne bonso bekutyile nabo umbumo bayuke ne myanda ilongeka mu matanda makwabo adi kulampe na kyabo kipwilo ne kwimwena bumo bwabinebine budi umbukata mwa banababo kujokoloka ntanda yonso.​—⁠1 Petelo 2:17.

• Lelo i kamweno’ka kādi kamwena Befundi ba Bible ku bitango?

• Shintulula mulongolwelwanga ne mpangiko ipitanga ku kubungakana kwa kipindi ne ku bitango bya distrike.

[Kapango pa paje 18]

Drame ya Bible ku kitango kya distrike, Amerika

Kitango kya matanda, Polonye

Kitango kya matanda, Arjantine

Kubungakana kwa kipindi, Japon

Bākatenwe ku kitango batambula mabuku atala pa Bible, Swise

Lubatyijo ku kitango kya matanda, Afrique du Sud

Kulupulwa kwa dibuku dipya disambila pa Bible, Kanada

Bākatenwe ku kitango bemba kiundaunda, Espanye